ເພີ່ມທະວີ ຄວາມສັກສິດ ແລະ ປະສິດທິຜົນ ໃນການບໍລິຫານ ແລະ ການຄຸ້ມຄອງລັດ-ສັງຄົມ,ສ້າງບາດກ້າວບຸກທະລຸ ອັນໝັກແໜ້ນ ໃນການນໍາພາປະເທດຊາດໃຫ້ຫຼຸດພົ້ນອອກຈາກສະຖານະພາບ ຂອງປະເທດດ້ອຍພັດທະນາ ໃນປີ 2020, ສໍາເລັດຄາດໝາຍສະຫັດສະຫວັດດ້ານການພັດທະນາ (MDGs) ປີ 2015 ແລະ ຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VII ຢ່າງມີໄຊ!

ທ່ານ ເຈົ້າແຂວງຈຳປາສັກ ຕ້ອນຮັບການເຂົ້າຢ້ຽມຂຳນັບຄະນະຊາວໜຸ່ມຍິ່ປຸ່ນໂຄງການເດີນອາກາດ

ໃນຕອນເຊົ້າ ຂອງວັນທີ 12 ກັນຍາ 2018, ທີ່ຫ້ອງວ່າການແຂວງຈຳປາສັກ, ທ່ານ ບຸນຖອງ ດີວິໄຊ ເລຂາພັກແຂວງ ເຈົ້່າແຂວງຈຳປາສັກ ໄດ້ໃຫ້ກຽດຕ້ອນຮັບການເຂົ້າຢ້ຽມຂຳນັບຂອງ ທ່ານ ນາງ ມິຊິຣຸ ອິໂຕະ ຄະນະຊາວໜຸ່ມຍິ່ປຸ່ນໂຄງການເດີນອາກາດ ພ້ອມດ້ວຍຄະນະ 14 ທ່ານ  ໃນໂອກາດມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຈຳປາສັກ ໃນລະຫວ່າງວັນທີ 11-16 ກັນຍາ 2018.

ໃນໂອກາດດັ່ງກ່າວ, ທ່ານ ບຸນຖອງ ດີວິໄຊ ເລຂາພັກແຂວງ ເຈົ້່າແຂວງຈຳປາສັກ ໄດ້ສະແດງຄວາມຕ້ອນຮັບຢ່າງອົບອຸ່ນ ພ້ອມທັງໄດ້ກ່າວສະແດງຄວາມຍິນດີ ແລະ ຊົມເຊີຍ ຕໍ່ການມາເຄື່ອນໄຫວຢ້ຽມຢາມ ແລະ ເຮັດວຽກຢູ່  ແຂວງຈຳປາສັກ ຂອງຄະນະຊາວໜຸ່ມຍິ່ປຸ່ນໂຄງການເດີນອາກາດ ໃນຄັ້ງນີ້,   ຊຶ່ງເປັນການປະກອບສ່ວນ  ເສີມສ້າງສາຍພົວພັນ  ແລະ  ການຮ່ວມມື ຂອງສອງປະເທດ ສອງອົງການຈັດຕັ້ງມະຫາຊົນ  ກໍ່ຄືຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ແຂວງຈຳປາສັກ ແລະ ຄະນະຊາວໜຸ່ມຍິ່ປຸ່ນໂຄງການເດີນອາກາດ.  ຕໍ່ມາ ທ່ານ ອຸດົມສັກ ດີວິໄຊ ກຳມະການພັກແຂວງ ເລຂາ ຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ແຂວງຈຳປາສັກ ແລະ ທ່ານ ນາງ ມິຊິຣຸ ອິໂຕະ ຄະນະຊາວໜຸ່ມຍິ່ປຸ່ນໂຄງການເດີນອາກາດ ຕາງໜ້າຄະນະທັງສອງໄດ້ລາຍງານແຜນການມາເຄື່ອນໄຫວ, ຢ້ຽມຢາມ ແລະ ເຮັດກິດຈະກຳຢູ່ແຂວງຈຳປາສັກ ຂອງຄະນະຊາວໜຸ່ມຍິ່ປຸ່ນໂຄງການເດີນອາກາດ ເຊິ່ງວ່າໂຄງການນີ້ເປັນໂຄງການແລກປ່ຽນທາງດ້ານວັດທະນະທຳ, ແມ່ນໄດ້ມີການຮ່ວມມືກັນດ້ານໂຄງການພັດທະນາຊາວໜຸ່ມສາກົນ ຫຼືເອີ້ນວ່າ ໂຄງການເດີນອາກາດ ນັບແຕ່ປີ 2008 ເປັນຕົ້ນມາ ຈຸດປະສົງກໍແມ່ນເພື່ອສົ່ງເສີມສາຍພົວພັນມິດຕະພາບ ແລະ ຄວາມເຂົ້າໃຈເຊິ່ງກັນແລະກັນ ລະຫວ່າງ ຊາວໜຸ່ມລາວ ກັບ ຊາວໜຸ່ມຍິ່ປຸ່ນ.  ໃນເທື່ອນີ້ ແມ່ນເປັນຄັ້ງທີ 8 ທີ່ສູນກາງຊາວໜຸ່ມປະຊາຊົນ ປະຕິວັດລາວ ໄດ້ຕ້ອນຮັບຄະນະຊາວໜຸ່ມຍິ່ປຸ່ນ ຈຳນວນ 14 ທ່ານ ມາເຄື່ອນໄຫວຢູ່ ສປປ ລາວ  ໃນວັນທີ 8-25 ກັນຍາ 2018   ( ຢູ່ແຂວງຈຳປາສັກ ວັນທີ 11-16 ກັນຍາ 2018 ) ແລະ ໃນຂະນະດຽວກັນ ກໍຈະໄດ້ສົ່ງ  ຄະນະຊາວໜຸ່ມລາວຈຳນວນ10 ຄົນ ໄປເຄື່ອນໄຫວຢູ່ປະເທດຍິ່ປຸ່ນ, ເພື່ອເປັນການກະກຽມຄວາມພ້ອມດ້ານຕ່າງໆ.

ໃນໂອກາດມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຈຳປາສັກ ຄະນະຊາວໜຸ່ມຍິ່ປຸ່ນໂຄງການເດີນອາກາດ ໄດ້ໄປຢ້ຽມຢາມ ມະຫາວິທະຍາໄລ ຈຳປາສັກ, ວິທະຍາໄລ ເຕັກນິກ ແຂວງຈຳປາສັກ ແລະ ທັດສະນະສຶກສາ ບໍລິສັດ ກາເຟດາວ, ເຂດເສດຖະກິດພິເສດ ປາກເຊ-ຍິປຸ່ນ, ທ່ຽວຊົມສວນປູກສະຕໍເບີລີ ຢາມາໂມໂຕະ ເຊິ່ງແມ່ນຄົນຍິປຸ່ນເປັນເຈົ້າຂອງ ຢູ່ເຂດບ້ານບັງລຽງ, ເມືອງປາກຊ່ອງ ຈາກນັ້ນຢ້ຽມຊົມ ນ້ຳຕົກຕາດຟານ, ຕາດເຍືອງ ແລະ  ມີກິດຈະກຳໃສ່ບາດຍາມເຊົ້າ ທີ່ ວັດຫຼວງ ນະຄອນປາກເຊ, ທ່ຽວຊົມ ແລະ ທັດສະນະສຶກສາ ທີ່ວັດພູຈຳປາສັກ ນຳອີກດ້ວຍ.

 

ຂ່າວ-ພາບ: ທັດຊະນະ ແສງດາລາ

ຈຳນວນຜູ້ເຂົ້າຊົມ

82164
ມື້ນີ້:ມື້ນີ້:2
ມື້ວານນີ້:ມື້ວານນີ້:75
ອາທິດນີ້:ອາທິດນີ້:54
ເດືອນນີ້:ເດືອນນີ້:2048
ທັງໝົດ:ທັງໝົດ:82164