ເພີ່ມທະວີ ຄວາມສັກສິດ ແລະ ປະສິດທິຜົນ ໃນການບໍລິຫານ ແລະ ການຄຸ້ມຄອງລັດ-ສັງຄົມ,ສ້າງບາດກ້າວບຸກທະລຸ ອັນໝັກແໜ້ນ ໃນການນໍາພາປະເທດຊາດໃຫ້ຫຼຸດພົ້ນອອກຈາກສະຖານະພາບ ຂອງປະເທດດ້ອຍພັດທະນາ ໃນປີ 2020, ສໍາເລັດຄາດໝາຍສະຫັດສະຫວັດດ້ານການພັດທະນາ (MDGs) ປີ 2015 ແລະ ຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VII ຢ່າງມີໄຊ!

ທ່ານ ຮອງນາຍົກລັດຖະມົນຕີລົງຊີ້ນຳວຽກງານແກ້ໄຂໄພພິບັດຢູ່ແຂວງຈຳປາສັກ

ໃນວັນທີ 6 /9 / 2018 ຢູ່ທີ່ຫ້ອງວ່າການແຂວງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະກໍາມະການສະເພາະກິດແກ້ໄຂໄພພິພັດລະດັບຊາດ ພ້ອມດ້ວຍຄະນະໄດ້ເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກງານຢູ່ແຂວງ​ຈໍາປາສັກ, ໂດຍມີ ທ່ານ ບຸນຖອງ ດີວິໄຊ ເຈົ້າແຂວງໆຈໍາປາສັກ ພ້ອມດ້ວຍຄະນະພັກ​ຄະນະນໍາ, ອໍານາດການປົກຄອງແຂວງໃຫ້ການຕ້ອນຮັບ.

 

ໂອກາດນີ້: ທ່ານ ບຸນຖອງ ດີວິໄຊ ເຈົ້າແຂວງຈຳປາສັກ,ໄດ້ລາຍງານໃຫ້ຊາບເຖິງສະພາບການພັດທະນາເສດຖະກິດ-ສັງຄົມ ແລະ ສະພາບການໃຫ້ການຊ່ວຍເຫຼືອປະຊາຊົນທີ່ຖືກຜົນກະທົບຈາກໄພພິບັດນໍ້າຖ້ວມ ເຊິ່ງໃນນັ້ນໃຫ້ຮູ້ວ່າ: ປະຈຸບັນນີ້ທົ່ວແຂວງຈຳປາສັກຮັກສາໄດ້ສະຖຽນລະພາບທາງດ້ານການເມືອງມີຄວາມສະຫງົບ,ຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ. ການເກັບລາຍຮັບເຂົ້າງົບປະມານກໍ່ເພີ່ມຂື້ນຖ້າທຽບໃສ່ໃນໄລຍະດຽວກັນ. ພ້ອມດຽວກັນນີ້, ທ່ານ ບຸນຖອງ ດີວິໄຊ ໄດ້ລາຍງານໃຫ້ຊາບກ່ຽວກັບສະພາບໄພພິບັດທີ່ເກີດຂຶ້ນຢູ່ໃນແຂວງ ຈໍາປາສັກ ; ເຊິ່ງ ໄລຍະຜ່ານມາໄດ້ເກີດມີຝົນຕົກໜັກຢ່າງຕໍ່ເນື່ອງເປັນເວລາຫຼາຍວັນໄດ້ເຮັດໃຫ້ຈໍານວນປະລິມານນໍ້າເພີ່ມຂຶ້ນ ແລະ ໄຫຼເຂົ້າຖ້ວມບ້ານ, ເຮືອນ ແລະ ພື້ນທີ່ທໍາການຜະລິດຂອງປະຊາຊົນ, ມີ 331 ບ້ານ, 15.069 ຄອບຄົວ,  87.238 ຄົນ ໄດ້ຮັບຜົນກະທົບ, ເນື້ອທີ່ນາຖືກນໍ້າຖ້ວມ 10.966 ເຮັກຕາ, ເສຍຫາຍ 7.965 ເຮັກຕາ, ເນື້ອທີ່ພຶດຜັກຖືກຖ້ວມ 955 ເຮັກຕາ, ເສຍຫາຍ 669 ເຮັກຕາ ແລະ ພື້ນຖານໂຄງລ່າງຖືກເສຍຫາຍຈໍານວນໜຶ່ງ ເປັນຕົ້ນ ເສັ້ນທາງ, ຊົນລະປະທານ, ໂຮງຮຽນ ແລະ ອື່ນໆ.

ໃນໂອກາດນີ້ ອຳນາດການປົກຄອງແຂວງຈຳປາສັກກໍ່ໄດ້ຮັບຟັງການໂອ້ລົມ ຊີ້ທິດເຍືອງທາງຈາກ ທ່ານ  ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສ ປ ປ ລາວ ເຊິ່ງທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ແຂວງຈຳປາສັກຍາດມາໄດ້ ແລະ ເນັ້ນຫຼາຍບັນຫາເປັນຕົ້ນແມ່ນ ວຽກງານຄຸ້ມຄອງການລົງທືນ, ວຽກງານການຜະລິດເປັນສິນຄ້າ, ສຳລັບໄພພິບັດທີ່ເກີດຂຶ້ນຢູ່ທີ່ແຂວງໃນຄັ້ງນີ້, ໃຫ້ເອົາໃຈໃສ່ໃນການຊ່ວຍເຫຼືອປະຊາຊົນທີ່ຖືກຜົນກະທົບ ໂດຍສະເພາະ ຊີວິດ ແລະ ຊັບສິນຂອງປະຊາຊົນ; ຮັກສາສຸຂະພາບຂອງປະຊາຊົນ, ຟື້ນຟູທາງດ້ານຈິດໃຈ, ສ້າງທີ່ພັກອາໃສ, ສະໜອງເຄື່ອງອຸປະໂພກ-ບໍລິໂພກ ພາຍຫຼັງນໍ້າລົງໃຫ້ມີການວາງແຜນເພື່ອຟື້ນຟູຊີວິດການເປັນຢູ່ ຂອງຜູ້ທີ່ໄດ້ຮັບຜົນກະທົບ ໃຫ້ກັບຄືບສູ່ສະພາບປົກກະໂດຍໄວ ເປັນຕົ້ນ ການກະກຽມເນື້ອທໍາການຜະລິດ, ການສະໜອງແນວພັນພືດ-ສັດ ໃຫ້ປະຊາຊົນ ໃຫ້ທັນຕາມລະດູການ ທີ່ຈະມາເຖິງ. ພ້ອມດຽວກັນນັ້ນ, ໃຫ້ເອົາໃຈໃສ່ໃນຝຶກຊ້ອມ ແລະ ຕິດຕາມຢ່າງໃກ້ສິດ ກ່ຽວກັບການປ່ຽນແປງຂອງ ດິນຟ້າອາກາດ ແຕ່ລະໄລຍະຈາກກົມອຸຕຸນິຍົມ ແລະ ອຸທຸກກະສາດເພື່ອກຽມພ້ອມຮັບມືຕະຫຼອດເວລາ.

ຂ່າວ-ພາບ: ທັດຊະນະ ແສງດາລາ

 

ຈຳນວນຜູ້ເຂົ້າຊົມ

82164
ມື້ນີ້:ມື້ນີ້:2
ມື້ວານນີ້:ມື້ວານນີ້:75
ອາທິດນີ້:ອາທິດນີ້:54
ເດືອນນີ້:ເດືອນນີ້:2048
ທັງໝົດ:ທັງໝົດ:82164