ເພີ່ມທະວີ ຄວາມສັກສິດ ແລະ ປະສິດທິຜົນ ໃນການບໍລິຫານ ແລະ ການຄຸ້ມຄອງລັດ-ສັງຄົມ,ສ້າງບາດກ້າວບຸກທະລຸ ອັນໝັກແໜ້ນ ໃນການນໍາພາປະເທດຊາດໃຫ້ຫຼຸດພົ້ນອອກຈາກສະຖານະພາບ ຂອງປະເທດດ້ອຍພັດທະນາ ໃນປີ 2020, ສໍາເລັດຄາດໝາຍສະຫັດສະຫວັດດ້ານການພັດທະນາ (MDGs) ປີ 2015 ແລະ ຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VII ຢ່າງມີໄຊ!

ຈໍາປາສັກເປີດກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 8 ສະໄໝທີ VII

ວັນທີ 23-26 ກໍລະກົດ 2018,  ຄະນະບໍລິຫານງານພັກແຂວງຈໍາປາສັກ  ໄດ້ເປີດກອງປະຊຸມຄົບຄະນະ ຄັ້ງທີ 8 ສະໄໝທີ VII ເຊິ່ງກອງປະຊຸມ ຈັດຂຶ້ນຢູ່ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງ ສະຫາຍ ປອ.ບຸນຖອງ ດີວິໄຊ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໆຈໍາປາສັກ. ມີສະຫາຍຮອງເລຂາພັກແຂວງ, ຄະນະປະຈໍາພັກແຂວງ, ກໍາມະການພັກແຂວງ, ເຈົ້າຄອງນະຄອນປາກເຊ, ເລຂາພັກເມືອງ, ເຈົ້າເມືອງ 9 ເມືອງ, ຫົວໜ້າພະແນກການກົມກອງອ້ອມຂ້າງແຂວງເຂົ້າຮ່ວມ.

ໃນໂອກາດກ່າວເປີດກອງປະຊຸມ ສະຫາຍ ປອ.ບຸນຖອງ ດີວິໄຊ ປະທານກອງປະຊຸມໄດ້ມີຄໍາເຫັນວ່າ: ກອງປະຊຸມຄັ້ງນີ້ ສຸດທີ່ມີຄວາມສໍາຄັນຢ່າງຍິ່ງ ເພາະຈະໄດ້ພ້ອມກັນສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 7 ສະໄໝທີ VII ແລະ ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ ໃນໄລຍະຜ່ານມາ ພ້ອມທັງຜ່ານບັນດາເນື້ອໃນຕົ້ນຕໍໃນການສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງໃນຊຸມປີຕໍ່ໜ້າ ລວມທັງການກະກຽມດໍາເນີນກອງປະຊຸມໃຫຍ່ອົງຄະນະພັກ 3 ຂັ້ນຕື່ມອີກ. ຍ້ອນແນວນັ້ນ ຂໍໃຫ້ຜູ້ເຂົ້າຮ່ວມກອງປະຊຸມພ້ອມກັນເອົາໃຈໃສ່ຄົ້ນຄ້ວາປະກອບຄໍາຄິດຄໍາເຫັນຢ່າງພາວະວິໄສ ແລະ ກົງໄປກົງມາ ເພື່ອເຮັດໃຫ້ກອງປະຊຸມມີເນື້ອໃນ ແລະ ມີຄວາມໝາຍເລິກເຊິ່ງ.

ຕໍ່ມາ ສະຫາຍ ສົມສະໜິດ ບຸດຕິວົງ ຮອງເລຂາຄະນະບໍລິຫານງານພັກແຂວງ ຮອງເຈົ້າແຂວງໆຈໍາປາສັກ ກໍ່ໄດ້ຕາງໜ້າຄະນະປະຈໍາພັກແຂວງ ຂຶ້ນສະເໜີບົດລາຍງານກ່ຽວກັບການຕີລາຄາການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 7 ສະໄໝທີ VII ແລະ ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ ໃນໄລຍະຜ່ານມາ ພ້ອມທັງຜ່ານບັນດາເນື້ອໃນຕົ້ນຕໍໃນການສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງໃນຊຸມປີຕໍ່ໜ້າ. ຈາກນັ້ນ ຕາງໜ້າຂົງເຂດປ້ອງກັນຊາດ-ປ້ອງກັນຄວາມສະຫົງບ ແລະ ພະແນກການຕ່າງປະເທດ ກໍ່ໄດ້ປະກອບຄໍາຄິດຄໍາເຫັນ ວິເຄາະວິໄຈບັນຫາຄົງຄ້າງ, ທິດທາງ ແລະ ມາດຕະການແກ້ໄຂໃນຕໍ່ໜ້າ ຕົ້ນຕໍແມ່ນການຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ; ການແກ້ໄຂປາກົດການຫຍໍ້ທໍ້ໃນສັງຄົມ, ບັນຫາຢາເສບຕິດ, ບັນຫາອາຊະຍາກໍາຕ່າງໆ, ບັນຫາອຸປັດເຫດຕາມທ້ອງຖະໜົນ, ການຍົກຍ້າຍຂອງພົນລະເມືອງທີ່ຜິດກົດໝາຍ ແລະ ບັນຫາອື່ນໆທີ່ພົ້ນເດັ່ນ ລວມທັງການຜັນຂະຫຍາຍແນວທາງການຕ່າງປະເທດຂອງພັກ, ການຮ່ວມມື 2 ຝ່າຍ ແລະ ການຄຸ້ມຄອງອົງການຈັດຕັ້ງສາກົນ ທີ່ບໍ່ສັງກັດລັດຖະບານ.

ສ່ວນຂົງເຂດເສດຖະກິດ ໄດ້ປະກອບຄໍາເຫັນວິເຄາະວິໄຈບັນຫາຂໍ້ຄົງຄ້າງ, ທິດທາງ ແລະ ມາດຕະການແກ້ໄຂໃນຕໍ່ໜ້າ ຕົ້ນຕໍແມ່ນການຄຸ້ມຄອງເສດຖະກິດມະຫາພາກ, ການຄຸ້ມຄອງ ແລະ ດຶງດູດການລົງທຶນ ທັງພາຍໃນ ແລະ ຕ່າງປະເທດ; ການຈັດເກັບລາຍຮັບ, ການຄຸ້ມຄອງລາຍຈ່າຍງົບປະມານ, ການຄຸ້ມຄອງທຸລະກິດ ແລະ ການສ້າງແຜນງົບປະມານ ປີ 2019; ການຊຸກຍູ້ການຜະລິດສິນຄ້າ ແລະ ການແກ້ໄຂຄວາມທຸກຍາກຂອງປະຊາຊົນ; ການຊຸກຍູ້ການຜະລິດພາຍໃນ ແລະ ການສົ່ງເສີມທຸລະກິດຂະໜາດນ້ອຍ-ຂະໜາດກາງ; ການຄຸ້ມຄອງ ແລະ ພັດທະນາທີ່ດິນ, ການຜັນຂະຫຍາຍມະຕິຂອງຄະນະບໍລິຫານງານສູນກາງພັກ ເລກທີ 26 ວ່າດ້ວຍການຄຸ້ມຄອງ ແລະ ພັດທະນາທີ່ດິນໃນໄລຍະໃໝ່. ນອກນີ້ ພະແນກໂຍທາທິການ ແລະ ຂົນສົ່ງ, ພະແນກພະລັງງານ ແລະ ບໍ່ແຮ່, ພະແນກໄປສະນີ ໂທລະຄົມມະນາຄົມ ແລະ ການສື່ສານ, ພະແນກວິທະຍາສາດ ແລະ ເຕັກໂນໂລຊີ ແລະ ອພບຕ ນະຄອນປາກເຊ ກໍ່ໄດ້ມີຄໍາເຫັນຕື່ມອີກ.

ຂົງເຂດວັດທະນະທໍາ-ສັງຄົມ ກໍ່ໄດ້ປະກອບຄໍາເຫັນລົງເລິກກ່ຽວກັບການຊຸກຍູ້ ແລະ ການສົ່ງເສີມການທ່ອງທ່ຽວ, ການຄຸ້ມຄອງ, ການຕິດຕາມກວດກາທຸລະກິດບໍລິການບັນເທີງ; ບັນຫາແຮງງານ, ວຽກງານຄຸ້ມຄອງໄພພິບັດ ແລະ ການຊ່ວຍເຫຼືອ; ການຍົກສູງຄຸນນະພາບການສຶກສາໃນລະບົບສາມັນ ແລະ ການກໍ່ສ້າງຊັບພະຍາກອນມະນຸດ-ການສຶກສາຕໍ່ວິຊາຊີບ; ການຄວບຄຸມ ແລະ ສະກັດກັ້ນພະຍາດລະບາດຕ່າງໆ; ການປັບປຸງການບໍລິການຂອງໂຮງໝໍແຂວງ. ພ້ອມນີ້ ບັນດາສະຫາຍຜູ້ຮັບຜິດຊອບຂົງເຂດແນວລາວສ້າງຊາດ, ອົງການຈັດຕັ້ງມະຫາຊົນ ຊາວໜຸ່ມ, ແມ່ຍິງ, ກໍາມະບານ ແລະ ສະຫະພັນນັກຮົບເກົ່າ ກໍ່ໄດ້ປະກອບຄໍາເຫັນ.

ສໍາລັບຂົງເຂດພັກ-ພະນັກງານ ກໍ່ໄດ້ປະກອບຄໍາເຫັນລົງເລິກກ່ຽວກັບວຽກງານພັກ-ພະນັກງານ ແລະ ແຜນການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ; ການຍົກສູງປະສິດທິພາບໃນການຄຸ້ມຄອງລັດ-ຄຸ້ມຄອງສັງຄົມ ດ້ວຍລະບຽບກົດໝາຍ; ການປະຕິບັດວຽກງານແນວຄິດ; ແຜນການກໍ່ສ້າງພະນັກງານທາງດ້ານການເມືອງ-ການປົກຄອງ. ສ່ວນຂົງເຂດອໍານາດລັດ ກໍ່ໄດ້ປະກອບຄໍາເຫັນກ່ຽວກັບການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ແລະ ແຜນການກະກຽມກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ; ການແກ້ໄຂຄະດີຕ່າງໆ, ການເຜີຍແຜ່ກົດໝາຍ ແລະ ສ້າງຄວາມເຂົ້າໃຈໃນການປະຕິບັດກົດໝາຍ; ການຈັດຕັ້ງປະຕິບັດຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດ; ການປັບປຸງຄຸນນະພາບໃນການເຄື່ອນໄຫວຂອງກົງຈັກການຈັດຕັ້ງ ແລະ ການບັນຈຸລັດຖະກອນໃໝ່ ໂດຍສະເພາະການປັບປຸງພາລະບົດບາດ, ໜ້າທີ່, ຂອບເຂດສິດ ແລະ ຕໍາແໜ່ງງານ. ຈາກນັ້ນ ຫົວໜ້າຄະນະກວດກາພັກ-ລັດແຂວງ ກໍ່ໄດ້ຜ່ານບົດສໍາຫຼວດການນໍາພາລວມຂອງຄະນະບໍລິຫານງານພັກແຂວງ ໃນໄລຍະ 1 ປີ ນັບແຕ່ສໍາເລັດບັ້ນດໍາເນີນຊີວິດການເມືອງປັບປຸງປົວແປງພັກ ປີ 2017.

ຈຳນວນຜູ້ເຂົ້າຊົມ

82164
ມື້ນີ້:ມື້ນີ້:2
ມື້ວານນີ້:ມື້ວານນີ້:75
ອາທິດນີ້:ອາທິດນີ້:54
ເດືອນນີ້:ເດືອນນີ້:2048
ທັງໝົດ:ທັງໝົດ:82164