ຂ່ຳນັບຮັບຕ້ອນວັນຊາດທີ 2 ທັນວາ ຄົບຮອບ 42 ປີຢ່າງສຸດໃຈ!, ຮ່ວມກັນເປັນເຈົ້າພາບທີ່ດີໃນປີທ່ອງທ່ຽວລາວ 2018

ພາກລັດເຂັ້ມງວດໃນການຂື້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດ

ພາກລັດເຂັ້ມງວດໃນການຂື້ນທະບຽນໃຫ້ຊາວຕ່າງດ້າວ ໂດຍໄດ້ມາເຜີຍແຜ່ຄຳສັ່ງຂອງນາຍົກລັດຖະມົນຕີ ໃຫ້ມີການຂື້ນທະບຽນ ແລະ ອອກໃບອະນຸຍາດຊົ່ວຄາວໃຫ້ຄົນຕ່າງປະເທດ ທີ່ມາເຄື່ອນໄຫວແບບບໍ່ຖືກຕ້ອງ ພາຍ ໃນປະເທດເວົ້າລວມເວົ້າສະເພາະ ພາຍໃນແຂວງຈຳປາສັກເພື່ອຄວາມເປັນລະບຽບຮຽບຮ້ອຍ ແລະ ສະດວກໃນ ການຄຸ້ມຄອງ.

ພິທີເຜີຍແຜ່ດັ່ງກ່າວມີຂື້ນໃນວັນທີ 24 ມີນາ 2016 ນີ້ ທີ່ຫ້ອງວ່າການປົກຄອງແຂວງຈຳປາສັກ ເຊິ່ງໃຫ້ ກຽດເປັນປະທານຂອງທ່ານ ສົມສະໜິດ ບຸດຕິວົງ ຮອງເຈົ້າແຂວງໆ ຈຳປາສັກ ມີຜູ້ຕາງໜ້າຈາກກົງສູນຫວຽດນາມ ປະຈຳພາກໃຕ້, ກົງສູນໄທ, ສະມາຄົມຈີນ, ສະມາຄົມຫວຽດນາມ ແລະ ພາກສ່ວນນັກທຸລະກິດພາຍໃນແຂວງ ແລະ ຂະແໜງການກ່ຽວຂ້ອງຈາກພາກລັດເຂົ້າຮ່ວມຢ່າງພ້ອມພຽງ.

ໃນກອງປະຊຸມ ທ່ານ ສົມສະໜິດ ບຸດຕິວົງ ກ່າວວ່າ: ເນື່ອງຈາກໃນປັດຈຸບັນ ຄົນຕ່າງປະເທດທີ່ເຂົ້າມາເຄື່ອນໄຫວແບບບໍ່ຖືກຕ້ອງຢູ່ປະເທດເຮົາ ແມ່ນຍັງມີຈຳນວນຫຼາຍ ແລະ ເພີ່ມຂື້ນເຮັດໃຫ້ເກີດຄວາມບໍ່ເປັນລະບຽບຮຽບຮ້ອຍ ແລະ ບໍ່ສາມາດຄວບຄຸມໄດ້ ເພື່ອເຮັດໃຫ້ບັນຫາດັ່ງກ່າວ ໄດ້ຮັບການແກ້ໄຂ ໃນທາງທີ່ດີຂື້ນ, ແນໃສ່ເຮັດໃຫ້ສັງຄົມມີຄວາມເປັນລະບຽບຮຽບຮ້ອຍ ທັງເປັນການປົກປ້ອງສິດ ແລະ ຜົນປະໂຫຍດຂອງແຮງງານເຄື່ອນຍ້າຍ, ລັດຖະບານຈຶ່ງໄດ້ອອກຄຳສັ່ງເຖິ່ງພາກລັດ ແລະ ປະຊາຊົນບັນດາເຜົ່າ, ຊາວຕ່າງປະເທດ, ຫົວໜ່ວຍທຸລະກິດການຜະລິດ ແລະ ການບໍລິການ, ໂຄງການທຸກປະເພດ, ເຂດເສດຖະກິດພິເສດ ແລະ ເຂດເສດຖະກິດສະເພາະໃນຂອບເຂດທົ່ວປະເທດ, ໂດຍມອບໃຫ້ຂະແໜງແຮງງານ ແລະ ສະຫວັດດີການສັງຄົມ ແລະ ຂະແໜງປົກປ້ອງຄວາມສະຫງົບຮ່ວມກັນດຳເນີນການຂື້ນທະບຽນ ແລະ ອອກບັດອະນະຍາດເຄື່ອນໄຫວຊົ່ວຄາວ ໃຫ້ຄົນຕ່າງປະເທດ ທີ່ຍັງເຄື່ອນໄຫວແບບບໍ່ຖືກຕ້ອງ ຢູ່ສປປ ລາວ, ພ້ອມດຽວກັນນັ້ນກໍ່ເພື່ອໃຫ້ທຸກຄົນ, ທຸກພາກສ່ວນທີ່ກ່ຽວຂ້ອງ ຈົ່ງອຳນວຍຄວາມສະດວກ ແລະ ເຂົ້າຮ່ວມຢ່າງຕັ້ງໜ້າ ໃນການຂື້ນທະບຽນ ແລະ ອອກບັດອະນຸຍາດຊົ່ວຄາວໃຫ້ຕົນຕ່າງປະເທດດັ່ງກ່າວ.

ຮອງເຈົ້າແຂວງຕ້ອນຮັບຄະນະຜູ້ແທນສານປະຊາຊົນແຂວງຢາລາຍ

ວັນທີ 22 ມີນາ 2016 ຢູ່ຫ້ອງວ່າການປົກຄອງແຂວງຈຳປາສັກ ພິທີຕ້ອນຮັບຄະນະຜູ້ແທນສານປະຊາຊົນ ແຂວງຢາລາຍ ແຫ່ງ ສສ ຫວຽດນາມ ໂດຍໃຫ້ກຽດຕ້ອນຮັບຂອງທ່ານ ສົມສະໜິດ ບຸດຕິວົງ ຮອງເຈົ້າແຂວງຈຳປາສັກ ພ້ອມການນຳຂອງແຂວງຈຳນວນໜື່ງ ຊຶ່ງຄະນະຜູ້ແທນສານປະຊາຊົນແຂວງຢາລາຍ ແມ່ນນຳໂດຍທ່ານດັງຟານຈຸງ ປະທານສານປະຊາຊົນແຂວງຢາລາຍ ພ້ອມຄະນະ.

ໃນການກ່າວຕ້ອນຮັບທ່ານ ສົມສະໜິດ ບຸດຕິວົງ ກໍ່ໄດ້ຕີລາຄາສູງຕໍ່ຄວາມສາມັກຄີຮອບດ້ານໃນການຊ່ວຍເຫຼືອເຊີ່ງກັນ ແລະ ກັນ ລະຫວ່າງແຂວງຈຳປາສັກ ແລະ ແຂວງຢາລາຍ ໂດຍສະເພາະແມ່ນການແລກປ່ຽນດ້ານວຽກງານວິຊາການຂອງສານປະຊາຊົນສອງແຂວງ ດັ່ງກ່າວທີ່ຈະຕ້ອງໄດ້ເອົາໃຈໃສ່ເພີ່ມທະວີເຮັດໃຫ້ວຽກງານ ດ້ານການເສີມສ້າງສາຍພົວພັນຮ່ວມມື ກ່ຽວກັບການຕັດສິນຄະດີໃຫ້ມີຄວາມສັກສິດລະອຽດອ່ອນເປັນທຳແກ່ສັງຄົມ ແລະ ສ້າງເງື່ອນໄຂໃຫ້ພະນັກງານວິຊາການຂອງສານປະຊາຊົນ ໄດ້ມີການຮ່ວມມືແລກປ່ຽນບົດຮຽນ ດ້ານວິຊາການ ໃນແຕ່ລະປີຢ່າງເປັນຂະບວນ.

ໂອກາດນີ້ ທ່ານ ດັງຟານຈຸງ ກໍ່ໄດ້ໃຫ້ຄຳໝັ້ນສັນຍາວ່າ: ຈະສືບຕໍ່ສ້າງສາຍພົວພັນມິດຕະພາບອັນດີງາມ ໃຫ້ເລິກເຊິ່ງຂື້ນກວ່າເກົ່າ ແລະ ຈະສ້າງທຸກເງື່ອນໄຂ ເພື່ອເຮັດໃຫ້ການຮ່ວມມືລະຫວ່າງສານປະຊາຊົນແຂວງຢາລາຍ ແລະ ແຂວງຈຳປາສັກໄດ້ຮັບການພັດທະນາກ້າວຂື້ນຢ່າງບໍ່ຢຸດຢັ້ງ.

ເຈົ້າແຂວງຈຳປາສັກ ເນັ້ນຫລາຍບັນຫາ ສ້າງເມືອງປາກເຊ ກາຍເປັນເມືອງສີຂຽວ!

 

ໃນໂອກາດ ​ທີ່ທ່ານເຈົ້າແຂວງໆຈຳປາສັກ ລົງໄປຢ້ຽມຢາມ ແລະ ຊີ້ນຳວຽກງານ ຢູ່ເມືອງປາກເຊ ທ່ານ ໄດ້ເນັ້ນໃຫ້ຄະນະນຳ ແລະ ອຳນາດການປົກຄອງ ເມືອງປາກເຊ ເອົາໃຈໃສ່ໃນການ ແກ້ໄຂບັນຫາຂີ້ເຫຍື້ອ ແລະ ຫລາຍບັນຫາສຳຄັນ ເພື່ອສ້າງໃຫ້ເມືອງປາກເຊ ກາຍເປັນເມືອງສີຂຽວ ສະອາດສວຍງາມໜ້າຢູ່ໜ້າທ່ຽວຊົມ ຮອງຮັບ ແກ່ການສ້າງເປັນ ນະຄອນໃນອະນາຄົດ.

 

​ເພື່ອ​ປະຕິບັດ​ວຽກ​ງານ​ດັ່ງກ່າວ ​ໃຫ້​ມີ​ຜົນສຳ​ເລັດ ກ່ອນ​ອື່ນ​ໝົດ​ອຳນາດການປົກຄອງ ເມືອງປາກເຊ ທຸກຂັ້ນຕ້ອງໄດ້ເອົາໃຈໃສ່ ແກ້ໄຂບັນຫາຂີ້ເຫຍື້ອ ໜຶ່ງໃນນັ້ນ ໃຫ້ດຶງເອົາ ບໍລິສັດເອກະຊົນ ເຂົ້າມາສຳປະທານຈັດເກັບຂີ້ເຫຍື່ອ ໂດຍສົມທົບກັບເມືອງປາກເຊ ແລະ ອພບຕ ເປັນຜູ້ຄຸ້ມຄອງກວດກາ. ສຳລັບບັນຫາການຂາຍເຄື່ອງ ໃສ່ທາງຄົນຍ່າງ ເຮັດໃຫ້ຕົວເມືອງບໍ່ຈົບງາມ, ການປ່ອຍສັດເຂົ້າເສັ້ນທາງ, ການຖິ້ມຂີ້ເຫຍື້ອຊະຊາຍ ຂອງລົດໂດຍສານ ແລະ ວຽກງານອື່ນໆ ແມ່ນຕ້ອງສ້າງຕັ້ງ ຄະນະກຳມະການ ໂດຍມີຫ້ອງການ ທີ່ກ່ຽວຂ້ອງ ລົງໄປກວດກາ ຄວາມເປັນລະບຽບຮຽບຮ້ອຍ ຖ້າພົບເຫັນແມ່ນ ໃຫ້ສຶກສາອົບຮົມ ແລະ ເຮັດບົດບັນທຶກ, ຖ້າຍັງບໍ່ປະຕິບັດ ຕາມແມ່ນປັບໃໝ ແລະ ດຳເນີນມາດຕາການ ຕາມລະບຽບກົດໝາຍຢ່າງຈິງຈັງ. ໃຫ້ອອກແຈ້ງການ ລົງສູ່ກຸ່ມບ້ານ, ບ້ານ, ຄອບຄົວ ໃຫ້ເປັນເຈົ້າໃນການຮັກສາ ຄວາມສະອາດ ໃນບໍລິເວນອ້ອມ ຂ້າງເຮືອນຂອງຕົນ ຖ້າເຮືອນໃດ ເປິະເປື້ອນ ບໍ່ອະນາໄມ ແມ່ນລົງໄປຕັກເຕືອນ ສຶກສາອົບຮົບ ໂດຍມອບໃຫ້ ຄະນະກຳມະການກວດ ກາຂັ້ນເມືອງ ລົງສົມທົບກັບ ອຳນາດການ ປົກຄອງບ້ານ ເພື່ອສ້າງສະຕິເປັນເຈົ້າ ໃຫ້ກັບປະຊາຊົນ.

 

ພາຍໃຕ້ ລະບອບໃໝ່ເສດຖະກິດຈຳປາສັກ ຂະຫຍາຍຕົວ ສະເລ່ຍ 10,9% ຕໍ່ປີ

 ກ່ອນການປົດປ່ອຍ ແຂວງຈຳປາສັກກໍຄືແຂວງ ອື່ນໆ ເສດຖະກິດແມ່ນຫຼ້າຫຼັງ ສິນຄ້າເກືອບ 100% ນຳເຂົ້າມາຈາກຕ່າງປະເທດ, ພາຍຫຼັງປະເທດຊາດ ໄດ້ຮັບການ ປົດປ່ອຍຢ່າງສົມບູນ ແລະ ພາຍໃຕ້ການຊີ້ນຳ ແລະ ນຳ ພາຂອງພັກ ປປ ລາວ, ຄະ ນະພັກ, ອຳນາດການປົກຄອງແຂວງຈຳປາສັກ ໄດ້ຈັດຕັ້ງຜັນ ຂະຫຍາຍແນວທາງ ຂອງພັກ, ແຜນພັດທະນາເສດຖະກິດ- ສັງຄົມຂອງລັດ ແຕ່ລະໄລຍະຢ່າງມີຜົນສຳເລັດ, ເຮັດໃຫ້ ແຂວງ ໄດ້ຮັບການພັດທະນາຢ່າງຮອບດ້ານ, ຊີວິດການເປັນ ຢູ່ຂອງ ປະຊາຊົນ ໄດ້ຮັບການປັບປຸງທາງດ້ານວັດຖຸ ແລະ ຈິດ ໃຈ.

ໃນບົດລາຍງານການເມືອງ ຂອງກອງປະຊຸມອົງຄະນະ ພັກແຂວງຈຳປາສັກ ຄັ້ງທີ VII (22-24/7/2015) ທ່ານ ດຣ. ບຸນຖອງ ດີວິໄຊ ເລຂາພັກແຂວງ ເຈົ້າແຂວງ ຈຳປາສັກ ໄດ້ຊີ້ໃຫ້ເຫັນວ່າ: ເສດຖະກິດຂອງແຂວງສືບຕໍ່ຂະຫຍາຍຕົວ ແລະ ມີຄວາມໝັ້ນທ່ຽງ ລວມຍອດຜະລິດຕະພັນພາຍໃນ 5 ປີ (2011-2015) ບັນລຸໄດ້ 45.046 ຕື້ກີບ, ສະເລ່ຍໃນແຕ່ລະປີບັນລຸໄດ້ 9 ພັນຕື້ກີບ, ອັດຕາການຂະຫຍາຍຕົວຂອງເສດຖະກິດເພີ່ມຂຶ້ນ ຈາກ 10,1% ໃນສົກປີ 2010-2011 ມາເປັນ 11,6% ໃນສົກປີ 2014-2015, ເພີ່ມຂຶ້ນສະເລ່ຍ 10,9% ຕໍ່ປີ, ໂຄງປະກອບເສດຖະກິດ ຫັນປ່ຽນຕາມທ່າອ່ຽງທີ່ຕັ້ງໜ້າ, ໃນນັ້ນ: ຂະແໜງ ກະສິກຳ-ປ່າໄມ້ ເພີ່ມຂຶ້ນສະເລ່ຍ 3,04% ກວມ 27%; ຂະ ແໜງອຸດສາຫະກຳເພີ່ມຂຶ້ນສະເລ່ຍ 15,3% ກວມ 34%; ຂະແໜງບໍລິການເພີ່ມຂຶ້ນ 15,7% ກວມ 39%; ລາຍຮັບສະເລ່ຍ ຕໍ່ຫົວຄົນ ເພີ່ມຈາກ 1.213 ໂດລາສະຫະລັດ ໃນສົກປີ 2010- 2011 ມາເປັນ 2.005 ໂດລາສະຫະລັດ ໃນສົກປີ 2014- 2015, ອັດຕາເງິນເຟີ້ສະເລ່ຍ 5,1% ຕໍ່ປີ, ອັດຕາແລກ ປ່ຽນໂດຍລວມມີຄວາມສະຫງົບປົກກະຕິເງິນກີບອ່ອນຄ່າ 0,3% ຖ້າທຽບໃສ່ເງິນໂດລາສະຫະລັດ. ໃນດ້ານການລົງທຶນລວມ ຍອດມູນຄ່າການ ລົງທຶນໃນ 5 ປີຜ່ານ ມາປະຕິບັດໄດ້ 14.740 ຕື້ກີບ ທຽບໃສ່ແຜນ 5 ປີ ປະຕິບັດໄດ້ 73%, ໃນນັ້ນ: ການລົງ ທຶນຂອງລັດ 720 ຕື້ກີບ ກວມ 4,9%, ການລົງທຶນເອກະຊົນພາຍໃນ ແລະ ຕ່າງປະເທດ 8.722 ຕື້ກີບ ກວມ 59%, ການ ຊ່ວຍເຫຼືອລ້າ ແລະ ກູ້ຢືມຈາກຕ່າງປະເທດ 1.634 ຕື້ກີບ ກວມ 11%, ທະນາຄານໄດ້ປ່ອຍສິນເຊື່ອ ໃຫ້ປະຊາຊົນ ແລະ ການ ຜະລິດທຸລະກິດ 3.664 ຕື້ກີບ ກວມ 25,1%. ລວມຍອດເກັບລາຍຮັບໄດ້ທັງໝົດ 4.491 ຕື້ກີບ, ທຽບ ໃສ່ແຜນ 5 ປີເພີ່ມຂຶ້ນ 4% ແລະ ກວມ 9,9% ຂອງ GDP; ສ່ວນ ລາຍຈ່າຍງົບປະມານປະຕິບັດໄດ້ທັງໝົດ 2.384 ຕື້ກີບ ທຽບໃສ່ແຜນ 5 ປີເພີ່ມຂຶ້ນ 0,6% ແລະກວມ 5,3% ຂອງ GDP. ດ້ານໂຄງປະກອບແຮງງານ ແມ່ນໄດ້ຫັນປ່ຽນໄປຕາມໂຄງປະ ກອບດ້ານເສດຖະກິດ ເທື່ອລະກ້າວ, ປີ 2015 ແຂວງຈຳປາ ສັກ ມີແຮງງານ (14-60 ປີ) ປະມານ 410.566 ຄົນ, ກວມ ເອົາ 58% ຂອງພົນລະເມືອງໃນທົ່ວແຂວງ, ໃນນັ້ນ: ຂົງເຂດ ກະສິກຳ ກວມ 67% ທຽບໃສ່ 2010-2011 ຫຼຸຸດລົງ 4%, ຂົງ ເຂດອຸດສາຫະກຳ ກວມ 6% ທຽບໃສ່ 2010-2011 ເພີ່ມຂຶ້ນ 2% ແລະ ບໍລິການ 25% ທຽບໃສ່ 2010-2011 ເພີ່ມຂຶ້ນ 2,6%. ສິນຄ້າສົ່ງອອກໄດ້ທັງໝົດ 587 ລ້ານໂດລາສະຫະລັດ ກວມ 10,4% ຂອງ GDP, ທຽບໃສ່ແຜນ 5 ປີ ປະຕິບັດໄດ້ ລື່ນແຜນ 26,5%, ການນຳ ເຂົ້າໄດ້ 496 ລ້ານໂດລາສະຫະ ລັດ ກວມ 8,8% ຂອງ GDP, ທຽບໃສ່ແຜນ 5 ປີ ລື່ນແຜນ 34%, ອັດຕາການເປີດກວ້າງຂອງເສດຖະກິດຕໍ່ GDP ແມ່ນ ເທົ່າກັບ 19,2%.

ມາຮອດປະຈຸບັນ ຄອບຄົວທຸກຍາກຍັງເຫຼືອ 867 ຄອບຄົວ ແລະ ບ້ານທຸກຍາກຍັງເຫຼືອ 23 ບ້ານ, ພິເສດ ແມ່ນໄດ້ປະ ກາດຮັບຮອງເອົາເມືອງບາຈຽງຈະເລີນສຸກ ແລະ ເມືອງສຸຂຸມາ ເປັນເມືອງພົ້ນທຸກ ໃນປີ 2014; ບ້ານພັດທະນາມີ 550 ບ້ານ ເທົ່າກັບ 86% ຂອງຈຳນວນບ້ານທັງໝົດ, ມີຄອບຄົວພັດທະ ນາ 114.258 ຄອບຄົວ ເທົ່າກັບ 94% ຂອງຈຳນວນຄອບຄົວ ທັງໝົດ, ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະ ບົດໄດ້ 19 ບ້ານ, ໄດ້ຮັບຮອງເອົາຕົວເມືອງປາກເຊ ເປັນເມືອງ ພັດທະນາ ແລະ ໄດ້ສ້າງກົມກອງພັດທະນາ ໃນທົ່ວແຂວງໄດ້ 121 ກົມກອງ.

ໃນ 5 ປີຜ່ານມາ ສາມາດຜະລິດເຂົ້າໄດ້ທັງໝົດ 2.257.955 ໂຕນ, ທຽບໃສ່ແຜນ 5 ປີປະຕິບັດໄດ້ 97% ສະເພາະສົກປີ 2014-2015 ຜະລິດໄດ້ 580.407 ໂຕນ, ໃນ ເນື້ອທີ່ 127.429 ຮຕ, ໃນນັ້ນ: ເນື້ອທີ່ນາປີມີ 110.853 ຮຕ, ທຽບໃສ່ສົກປີ 2010-2011 ເພີ່ມຂຶ້ນ 34% ຫຼື ເທົ່າກັບ 37.458 ຮຕ ແລະ ເນື້ອທີ່ນາແຊງມີ 16.576 ຮຕ, ທຽບໃສ່ສົກປີ 2010 - 2011 ເພີ່ມຂຶ້ນ 14% ຫຼື ເທົ່າກັບ 4.771 ຮຕ. ເນື້ອທີ່ປູກພືດສະບຽງອາຫານທັງໝົດ 24.806 ຮຕ ຜົນຜະລິດໄດ້ 460.877 ໂຕນ, ທຽບໃສ່ແຜນການ 5 ປີເພີ່ມຂຶ້ນ 32%, ສະ ເລ່ຍ 92.175 ໂຕນ/ປີ; ເນື້ອທີ່ການ ປູກພືດເປັນສິນຄ້າທັງໝົດ 38.264 ຮຕ, ຜົນຜະລິດໄດ້ 2.816.624 ໂຕນ, ທຽບໃສ່ແຜນ 5 ປີ ເພີ່ມຂຶ້ນ 1,7 ເທື່ອ.ເດັ່ນກວ່າໝູ່ແມ່ນພືດໃນສັນຍາຜູກພັນສອງສົ້ນ (Contract Farming); ການປູກໄມ້ກິນໝາກ ຊະນິດຕ່າງໆປະຕິບັດໄດ້ 11.970 ຮຕ, ຜົນຜະລິດໄດ້ທັງໝົດ 324.168 ໂຕນ, ທຽບ ໃສ່ແຜນການ 5 ປີໄດ້ 96%, ສະເລ່ຍ 64.834 ໂຕນ/ປີ; ການປູກກາເຟ ປະຕິບັດໄດ້ 50.145 ຮຕ, ໃຫ້ໝາກ 44.586 ຮຕ, ຜົນຜະລິດລວມ 277.888 ໂຕນ (ໝາກຊ້ອມ), ທຽບໃສ່ ແຜນການ 5 ປີ ເພີ່ມຂຶ້ນ 23%, ສະເລ່ຍ 55.578 ໂຕນ/ປີ; ເນື້ອທີ່ປູກຢາງພາລາ 28.824 ຮຕ, ທຽບໃສ່ແຜນການ 5 ປີ ບັນລຸໄດ້ 100%, ໃນນັ້ນ: ເນື້ອທີ່ໃຫ້ຜົນຜະລິດ 20.935 ຮຕ, ຜົນຜະລິດໄດ້ 83.545 ໂຕນ (ນ້ຳຢາງໃສ).

ການສະໜອງທາງດ້ານສະບຽງອາຫານປະເພດຊີ້ນ, ປາ ແລະ ອື່ນໆ ໃຫ້ແກ່ສັງຄົມໂດຍສະເລ່ຍໄດ້ 55,3 ກິໂລ/ຄົນ/ ປີ, ທຽບໃສ່ແຜນການ 5 ປີ ເພີ່ມຂຶ້ນ 9%, ການລ້ຽງສັດ: ມີຄວາຍ 147.905 ໂຕ, ງົວ 200.225 ໂຕ, ໝູ 840.715 ໂຕ, ສັດປີກ 24.003.788 ໂຕ ແລະ ລ້ຽງປາ 90.692 ໂຕນ ຊຶ່ງມີການ ລ້ຽງແບບ ທຳມະຊາດ ແລະ ແບບເປັນຟາມ, ສຳລັບການລ້ຽງ ແບບເປັນຟາມ ມີທັງໝົດ 192 ແຫ່ງ, ໃນນັ້ນ: ຟາມລ້ຽງໝູພັນ ຊີ້ນມີ 89 ແຫ່ງ, ຟາມລ້ຽງສັດປີກ 31 ແຫ່ງ, ຟາມລ້ຽງງົວ+ ຄວາຍ ມີ 30 ແຫ່ງ, ປາກະຊັງມີ 21 ແຫ່ງ ແລະ ຟາມອື່ນໆ. ໂຄງການທີ່ສາມາດສະໜອງນ້ຳໄດ້ທັງໝົດ 137 ໂຄງການ, ເນື້ອທີ່ຮັບນ້ຳຈາກຊົນລະປະທານ 17.396 ຮຕ, ທຽບໃສ່ຄາດໝາຍ 5 ປີ ປະຕິບັດໄດ້ 83%, ໃນນັ້ນ ໂຄງການໄຟຟ້າ 65 ໂຄງການ, ເນື້ອທີ່ 9.297 ຮຕ, ຝາຍນ້ຳລົ້ນ 60 ໂຄງການ, ເນື້ອທີ່ 2.746 ຮຕ, ອ່າງເກັບນ້ຳ 12 ໂຄງການ, ເນື້ອທີ່ 171 ຮຕ, ຈັກສູບນ້ຳດ້ວຍ ນ້ຳມັນມີ 16 ແຮງມ້າ ມີ 8.770 ເຄື່ອງ ຫົດເນື້ອທີ່ 5.182 ຮຕ.

ປະຈຸບັນ ທົ່ວແຂວງຈຳປາສັກ ມີໂຮງງານອຸດສາຫະກຳ, ຫັດຖະກຳປຸງແຕ່ງ ແລະ ຫົວໜ່ວຍການຜະລິດ ທັງໝົດ 2.067 ແຫ່ງ, ໃນນັ້ນໂຮງງານຂະໜາດໃຫຍ່ມີ 45 ແຫ່ງ, ຂະໜາດ ກາງ 35 ແຫ່ງ, ຂະໜາດນ້ອຍ 1.182 ແຫ່ງ ແລະ ແບບຄອບ ຄົວ 805 ແຫ່ງ, ມູນຄ່າຜະລິດຕະພັນບັນລຸໄດ້ 9.867 ຕື້ກີບ ທຽບໃສ່ແຜນ 5 ປີ ລື່ນແຜນ 7,8%. ທົ່ວແຂວງມີຕະຫຼາດທັງ ໝົດ 40 ແຫ່ງ, ໃນນັ້ນ ຕະຫຼາດໃຫຍ່ 2 ແຫ່ງ, , ຕະຫຼາດກາງ 3 ແຫ່ງ, ຕະຫຼາດນ້ອຍ ແລະ ຕະຫຼາດນັດ 35 ແຫ່ງ ແລະ ຕະ ຫຼາດກະສິກຳ 2 ແຫ່ງ, ມູນຄ່າການເກັບຊື້ປະຕິບັດໄດ້ 20.182 ຕື້ກີບ, ທຽບໃສ່ແຜນ 5 ປີປະຕິບັດໄດ້ 99,7%, ມູນຄ່າຈໍລະ ຈອນສິນຄ້າໄດ້ 15.358 ຕື້ກີບ, ທຽບໃສ່ແຜນ 5 ປີປະຕິບັດ ໄດ້ 67,8%.

ບ້ານທີ່ຊົມໃຊ້ໄຟຟ້າທັງໝົດ 611 ບ້ານ, ກວມ 94,5% ໃນທົ່ວແຂວງ; ຄອບຄົວຊົມໃຊ້ໄຟຟ້າທັງໝົດ 115.007 ຄົວ ເຮືອນ, ກວມເອົາ 95% ຂອງຄົວເຮືອນທັງໝົດ, ມີໄຟຟ້າແສງ ຕາເວັນ 1.311 ຄອບຄົວ; ມາຮອດປະຈຸບັນ ມີນັກລົງທຶນພາຍ ໃນ-ຕ່າງປະເທດ ໄດ້ເຊັນສັນຍາກັບລັດຖະບານ ແລະ ແຂວງ ເພື່ອສຳຫຼວດ ແລະ ກໍ່ສ້າງ ເຂື່ອນໄຟຟ້າພະລັງນ້ຳ ຈຳນວນ 25 ໂຄງການ, ໃນນັ້ນ ຂັ້ນສູນກາງມີ 10 ໂຄງການ ແລະ ຂັ້ນ ແຂວງມີ 15 ໂຄງການ. ດ້ານເສັ້ນທາງ ໄດ້ກໍ່ສ້າງເສັ້ນທາງ ເຊື່ອມຕໍ່ລະ ຫວ່າງແຂວງຫາເມືອງ, ເມືອງຫາບ້ານ ແລະ ຫາ ເຂດຈຸດສຸມບ້້ານພັດທະນາ, ໃນປີ 2015 ທົ່ວແຂວງມີເສັ້ນ ທາງຍາວທັງໝົດ 4.216,87 ກມ, ທຽບໃສ່ປີ 2010 ມີພຽງ 3.474 ກມ, ໃນນັ້ນເສັ້ນທາງເບຕົງ 40,34 ກິໂລແມັດ, ເສັ້ນ ທາງອັດສະຟານ 40,1 ກິໂລແມັດ, ເສັ້ນທາງປູຢາງ 698,12 ກິໂລແມັດ, ເສັ້ນທາງປູແຮ່ 1.556,6 ກິໂລແມັດ ແລະ ເສັ້ນທາງ ດິນທຳມະຊາດ 1.881,71 ກິໂລແມັດ. ໃນດ້ານວຽກງານ ອື່ນໆ ກໍໄດ້ຮັບການພັດທະນາ ຢ່າງກ້າວກະໂດດຂັ້ນເຊັ່ນດຽວກັນ.

ຈຳນວນຜູ້ເຂົ້າຊົມ

77088
ມື້ນີ້:ມື້ນີ້:112
ມື້ວານນີ້:ມື້ວານນີ້:114
ອາທິດນີ້:ອາທິດນີ້:416
ເດືອນນີ້:ເດືອນນີ້:1944
ທັງໝົດ:ທັງໝົດ:77088