ຂ່ຳນັບຮັບຕ້ອນວັນຊາດທີ 2 ທັນວາ ຄົບຮອບ 42 ປີຢ່າງສຸດໃຈ!, ຮ່ວມກັນເປັນເຈົ້າພາບທີ່ດີໃນປີທ່ອງທ່ຽວລາວ 2018

ວາງສີລາເລີກກໍ່ສ້າງ ມ ຕົ້ນ ວັດອະລັນຍາ ບ້ານດົງກະໂລງ

ໃນວັນທີ 28 ເມສາ 2017 ຢູ່ທີ່ວັດອະລັນຍາ ບ້ານດົງກະໂລງ     ເມືອງປາກເຊ ແຂວງຈຳປາສັກ ໄດ້ມີພິທີທາງສາດສະໜາ ວາງສີລາເລີກ   ເພື່ອກໍ່ສ້າງອາຄານຮຽນ ຊັ້ນ ມັດທະຍົມຕອນຕົ້ນ ໃຫ້ແກ່ພະສົງສຳມະເນນ ໄດ້ສຶກສາຮໍ່າຮຽນ ທາງພຸດທະສາດສະໜາ ເຊິ່ງແມ່ນທຶນຈາກຫຼາຍພາກສ່ວນ ເຊັ່ນ: ບໍລິສັດຫ້າງຮ້ານ, ບຸກຄົນ, ນິຕິບຸກຄົນ ຜູ້ທີ່ມີຈິດໃຈເຫຼື້ອມໃສສັດທາ ນຳເອົາຊັບສ່ວນຕົວ ມາບໍລິຈາກໃຫ້  ໂດຍພາຍໃຕ້ ການເປັນປະທານ  ຂອງພະອາຈານ ມະຫາສຸວັນ ຈັນທະລາດ ປະທານອົງການ ພຸດທະສາດສະໜາສຳພັນ ແຂວງຈຳປາສັກ, ທ່ານ ບົວລິນ ວົງພະຈັນ ຮອງເຈົ້າແຂວງຈຳປາສັກ ທ່ານຮອງເຈົ້າເມືອງ ປາກເຊ ແຂກຖືກເຊີນ ພ້ອມດ້ວຍເຖົ້າແກ່ແນວໂຮມ ອຳນາດການປົກຄອງບ້ານ ດັ່ງກ່າວເຂົ້າຮ່ວມ.

ອາຄານຮຽນ ເປັນອາຄານ 2 ຊັ້ນ 1 ຫຼັງ,    ມີຄວາມກ້ວາງ 26 ແມັດ,  ຍາວ 46 ແມັດ, ສູງ 14,60 ແມັດ, ປະກອບມີ 8 ຫ້ອງຮຽນ, ມີຫ້ອງຜູ້ອຳນວຍການ 1 ຫ້ອງ, ຫ້ອງພັກຄູ 1 ຫ້ອງ, ຫ້ອງສະໝຸດ 1 ຫ້ອງ , ຫ້ອງຄອມພີວເຕີ, ຫ້ອງປະຊຸມໃຫຍ່, ຫ້ອງຮັບແຂກ ແລະ ສ້າງຫ້ອງນໍ້າ 16 ຫ້ອງ ຕິດແປະ, ອາຄານມຸງດ້ວຍກະເບື້ອງ, ພື້ນເທເບຕົງເສີມເຫຼັກ, ຝາກໍ່ດ້ວຍດິນຈີ່, ໂຄງຫຼັງຄາເຮັດດ້ວຍເຫຼັກ, ມີລະໂຕະຕັ່ງ, ໄຟຟ້າ, ນໍ້າປະປາ, ພັດລົມຄົບຊຸດ    ລວມມູນຄ່າ ການກໍ່ສ້າງແມ່ນ  5.428 720 142 ກີບ  (ຫ້າຕື້ກ່ວາກີບ)      ເຊິ່ງການກໍ່ສ້າງແມ່ນ ເລີ່ມລົງມືແຕ່ມື້ປັກຝັງ ວາງສີລາເລີກ ເປັນຕົ້ນໄປ ເມື່ອສ້າງສຳເລັດແລ້ວ ຈະສາມາດຮອງຮັບພະສົງສຳມະເນນ ເຂົ້າມາສຶກສາຮໍ່າຮຽນ ໄດ້ຫຼາຍຮ້ອຍອົງ ທັງນີກໍ່ເພື່ອປັບປຸງ ພື້ນຖານໂຄງລ່າງ ໃຫ້ພຽງພໍ ຕໍ່ການເພີ່ມຂື້ນ ຂອງພະສົງທີ່ເຂົ້າມາຮຽນ ທັງເປັນການປົກປັກຮັກສາ ພຸດທະສາດສະໜາ ວັດທຳອັນດີງາມ ຂອງຊາດລາວເຮົາ ໃຫ້ຍືນຍົງຢູ່ຄູ່ບ້ານຄູ່ເມືອງ ຕະຫຼອດໄປ.

ຮອງເຈົ້າແຂວງຈຳປາສັກ ລົງຊີ້ນຳວຽກງານ ຂະແໜງການ ສຶກສາ-ກິລາ

ຮອງເຈົ້າແຂວງຈຳປາສັກລົງຊີ້ນຳວຽກງານຂະແໜງການສຶກສາ-ກິລາ

ເພື່ອເຮັດໃຫ້ວຽກງານ ຂອງຂະແໜງການສຶກສາ-ກິລາ ພາຍໃນແຂວງຈຳປາສັກ ໄດ້ມີໃບໜ້າອັນໃໝ່ ທີ່ມີການປ່ຽນແປງ ໄປໃນທ່າຂະຫຍາຍດີຂື້ນ ຕາມລຳດັບ ສ້າງໄດ້ຄຸນນະພາບການສຶກສາ ໃຫ້ຫຍັບເຂົ້າມໍ່ສາກົນ ເທື່ອລະກ້າວ ຕາມທິດນຳຂອງພັກ ທີ່ວາງໄວ້ ໂດຍຖືກເອົາວຽກງານ ການສຶກສາ-ກິລາ ເປັນປາຍແຫຼມ  ໃນການພັດທະນາ ຊັບພະຍາກອນມະນຸດ ເພື່ອສະໜອງຕອບ ໃນທຸກວຽກງານ ໃຫ້ພຽງພໍ ແລະ ມີຄຸນນະພາບ.

          ໃນວັນທີ 27 ເມສາ 2017 ທ່ານ ບົວລິນ ວົງພະຈັນ ຮອງເຈົ້າແຂວງຈຳປາສັກ ໄດ້ລົງເຄື່ອນໄຫວເຮັດວຽກ ຢູ່ 2 ຈຸດຄື:   ຈຸດພະແນກສຶກສາທິການ ແລະ ກິລາ ແຂວງຈຳປາສັກ ໂດຍໃຫ້ກຽດຕ້ອນຮັບ ຂອງທ່ານ ສີ ພັນທະວົງ ຮອງຫົວໜ້າພະແນກ ສຶກສາທິການ ແລະ ກິລາແຂວງຈຳປາສັກ, ມີຜູ້ອຳນວຍການໂຮງຮຽນອ້ອມຂ້າງ, ຫົວໜ້າຂະແໜງ ຮອງຂະແໜງ ພາຍໃນພະແນກ ສກຂ ຈຳປາສັກ ເຂົ້າຮ່ວມ ແລະ ຈຸດວິທະຍາໄລຄູ ປາກເຊ ໃຫ້ກຽດຕ້ອນຮັບ ໂດຍທ່ານ ພອນ ພູວັນໂນ ຮັກສາການຜູ້ອຳນວຍການ ວິທະຍາໄລຄູປາກເຊ ພ້ອມຄະນະ, ມີພະນັກງານຄູ-ອາຈານ ເຂົ້າຮ່ວມແຕ່ລະຈຸດ ທີ່ທ່ານຮອງເຈົ້າແຂວງ ໄດ້ລົງເຄື່ອນໄຫວໂອ້ລົມ ຊີ້ທິດເຍືອງທາງນັ້ນ ແມ່ນໄດ້ຮັບຟັງການລາຍງານ ສະພາບລວມ ຈຸດພິເສດດ້ານດີ, ດ້ານອ່ອນ, ຂໍ້ຄົງຄ້າງ ທິດທາງແກ້ໃຂໃນຕໍ່ໜ້າ ຫຼັງຈາກນັ້ນທ່ານໄດ້ໂອ້ລົມ ພ້ອມຊີ້ທິດເຍືອງທາງ ໃຫ້ທາງສອງແຫ່ງເອົາໃຈໃສ່ ປະຕິບັດຢ່າງເຂັ້ມງວດ ຄື: ຜູ້ບໍລິຫານການສຶກສາທຸກຂັ້ນ ຕ້ອງສ້າງຄ່ານິຍົມ ໃຫ້ເກີດມີໃນຂະແໜງການ ສຶກສາ-ກິລາ, ຈັດຕັ້ງປະຕິບັດ ການຈັດການຮຽນ-ການສອນ ໃຫ້ດີລື່ນເກົ່າ, ຜູ້ບໍລິຫານການສຶກສາທຸກຂັ້ນ ຕ້ອງລົງເລິກຕິດແທບໃຫ້ທົ່ວເຖິງ, ໂຮງຮຽນ ສະຖາບັນຕ່າງໆ ຕ້ອງປະຕິບັດຕາມຂໍ້ແຂ່ງຂັນ 4 ບຸກທະລຸ, ມີການວາງແຜນ ຊອກຫາວິທີແກ້ໄຂທີ່ແທດເໝາະ, ການສັບຊ້ອນພະນັກງານ ຄູ-ອາຈານ ໃຫ້ຖືກຕ້ອງ, ຕີຕ້ານປະກົດການຫຍໍ້ທໍ້ ໃນຂະແໜງການສຶກສາ ໂດຍສະເພາະລູກຫຼານ ຂອງພໍ່ແມ່ປະຊາຊົນ ເຮັດແນວໃດຈະສ້າງໃຫ້ເຂົາເປັນຄົນດີ ຮັກຄວາມກ້າວໜ້າ, ເອົາໃຈໃສ່ສຶກສາອົບຮົມ ທາງດ້ານການເມືອງ ແນວຄິດໃຈຖັນແຖວພະນັກງານ ຄູ-ອາຈານ ນັກຮຽນນັກສຶກສາ ບໍ່ໃຫ້ເຂົາເຈົ້າອ່ອນເພຍເປ້ຍລ່ອຍ, ນັກຮຽນບໍ່ສົນຕໍ່ການຮຽນມັກຫຼີ້ນ ແຕ່ໂທລະສັບ ໃຫ້ຜູ້ບໍລິຫານການສຶກສາ ທຸກຂັ້ນມີທິດແກ້ໄຂ, ຕ້ອງຍົກລະດັບຄູອາຈານທີ່ສິດສອນ ໃຫ້ມີຄວາມຮູ້ຄວາມສາມາດສູງລື່ນເກົ່າ ກາຍເປັນຄູປະສົບການ,ຄູສຳນານງານ, ວຽກງານການສຶກສາທຸກຢ່າງ ຕ້ອງມີການປະເມີນຜົນ ລົງຕິດຕາມກວດກາຢ່າງຖີ່ຖ້ວນ, ເອົາໃຈໃສ່ສ້າງຄູປະສົບການ ໃຫ້ຫຼາຍຂື້ນ, ຜູ້ບໍລິຫານ ຕ້ອງກວດກາເບິ່ງຄືນ ເພື່ອມີທິດກຳນົດ້ປົ້າໝາຍ ສ້າງຮຸ່ນສືບທອດ, ສ້າງບຸກຄະລາກອນຕ້ອງໄປຕາມ 3 ລັກສະນະ ແລະ 5 ຫຼັກມູນ, ຕ້ອງຕີລາຄາການນຳພາໃນໄລຍະຜ່ານມາ ອັນໃດປະຕິບັດໄດ້ອັນຍັງຄົງຄ້າງ, ຄູ-ອາຈານ ຕ້ອງນຳໃຊ້ຄວາມຮູ້ຄວາມສາມາດ ສິດສອນຢ່າງເຕັມເມັດເຕັມໜ່ວຍ ປະຕິບັດໜ້າທີ່ສົດຊື່ນແຈ່ມໃສ ດ້ວຍການຮັກອາຊີບແພງ ນັກຮຽນຄ, ຄູຕ້ອງມີຄວາມກະຕື້ລືລົ້ນ ສ້າງສະຖາບັນໃຫ້ເຂັ້ມແຂງ, ສ້າງຄ່ານິຍົມໃຫ້ເພີ່ມຂື້ນ, ສະຖາບັນສ້າງຄູຈະຕ້ອງສ້າງຄູແນວໃດ, ເມື່ອສ້າງແລ້ວກໍ່ຕ້ອງເບິ່ງຄືນໃຫ້ຄັກ ການນຳໃຊ້ຄູຕ້ອງປະຕິບັດນະໂຍບາຍ ໃຫ້ດີເທົ່າທີຄວນ, ຍົກຖານະ ໃນການສຶກສາຮໍ່າຮຽນ ພາສາຕ່າງປະເທດ ໃຫ້ຫຼາຍຂື້ນ, ຈະສ້າງຄູແນວໃດເພື່ອຈະເປັນຜູ້ຕັດສິນຊີ້ຂາດ ໃນການສ້າງຄົນຮຸ່ນໜຸ່ມ ເພື່ອເຮັດໜ້າຂອງຊາດ.

ວາງສິລືກໂຄງການກໍ່ສ້າງເຂື່່ອນໄຟຟ້າດອນສະໂຮງມູນຄ່າຫຼາຍຮ້ອຍລ້ານໂດລາ.

ວັນ​ທີ 16 ສິງຫາ 2016 ທີ່​ດອນ​ສະ​ໂຮງ​ເມືອງ​ໂຂງ ຈຳປາສັກໄດ້ຈັດພິທີວາງສິລາລືກໂຄງການກໍ່ສ້າງເຂື່ອນໄຟຟ້າດອນສະໂຮງ ມູນຄ່າຫຼາຍຮ້ອຍລ້ານໂດລາສະຫະລັດ ທີ່ມີກຳລັງຕິດຕັ້ງເຖິງ 260​ ເມກາວັດ, ເຊິ່ງໃຫ້ກຽດເຂົ້າຮ່ວມຂອງທ່ານ ປອ ສອນໄຊ ສີພັນດອນ ກຳມະການກົມການເມືອງສູນກາງພັກ ຮອງນາຍົກ ລັດຖະມົນຕີແຫ່ງ ສປປ ລາວ, ມີ ທ່ານ ດຣ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ປອ ບຸນຖອງ ດີວິໄຊ ກຳມະການສູນກາງພັກ ເລຂາພັກແຂວງ ເຈົ້າແຂວງໆຈຳປາສັກ. ມີຂະແໜງການທີ່ກ່ຽວຂ້ອງຈາກກະຊວງ ແລະ ທ້ອງຖິ່ນເຂົ້າຮ່ວມຢ່າງພ້ອມພຽງ.

 ໃນພິທີ ທ່ານ ດຣ ຄຳມະນີ ອິນທິລາດ ໃຫ້ຮູ້ວ່າ: ໂຄງການກໍ່ສ້າງເຂື່ອນໄຟຟ້າດອນສະໂຮງ ແມ່ນໂຄງການໜຶ່ງທີ່ສຳຄັນ, ຊຶ່ງຖືກກຳນົດຢູ່ໃນແຜນແມ່ບົດຂອງການພັດທະນາລະບົບໄຟຟ້າຢູ່ບ້ານເຮົາແຕ່ນີ້ຮອດປີ 2020 ຕາມແນວທາງ, ແຜນຍຸດທະສາດ ການຫັນເປັນອຸດສາຫະກຳທີ່ທັນສະໄໝ. ໂຄງການດັ່ງກ່າວໄດ້ກໍ່ສ້າງຂຶ້ນໃສ່ກິ່ງກ້ານສາຂາ ຫຼື ຮູສະໂຮງໃນຈຳນວນ 9 ຮູ ຂອງແມ່ນ້ຳໃນເຂດເມືອງໂຂງ, ເປັນໂຄງການໃຫຍ່ນຳໃຊ້ເຕັກນິກລະດັບສູງ, ທັນສະໄໝ, ມີລັກສະນະຄົບວົງຈອນ ແລະ ເປັນມິດກັບສິ່ງແວດລ້ອມ-ສັງຄົມ . ເມື່ອສ້າງສຳເລັດແລ້ວຈະມີກຳລັງຕິດຕັ້ງເຖິງ 260 ​ເມກາວັດ ແລະ ຈະນຳໃຊ້ທຶນເຂົ້າໃນການກໍ່ສ້າງທັງໝົດ 520 ລ້ານໂດລາສະຫະລັດ. ໂຄງການດັ່ງກ່າວຈະໃຫ້ສໍາເລັດໃນປີ 2019.

ທ່ານ ປອ ບຸນຖອງ ດີວິໄຊ ໃຫ້ຮູ້ຕື່ມວ່າ:ໂຄງການເຂື່ອນໄຟຟ້າດອນສະໂຮງ ເປັນໂຄງການໜຶ່ງທີ່ກະຕຸກຊຸກຍູ້ ແລະ ປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງຊາດ ເວົ້າລວມເວົ້າສະເພາະກໍ່ຄືແຂວງຈຳປາສັກ. ກ່ອນອື່ນໝົດແມ່ນຜົນປະໂຫຍດທາງດ້ານເສດຖະກິດ ເຊິ່ງພວກເຮົາຈະໄດ້ຮັບຜົນປະໂຫຍດທາງກົງ ຈາກການເກັບຄ່າພາກຫຼວງ, ເງິນປັນຜົນ, ລວມທັງພາສີອາກອນອື່ນໆ ແລະ ທີ່ສຳຄັນແມ່ນຈະໄດ້ພະລັງງານໄຟຟ້າມາເສີມສ້າງຄວາມໝັ້ນຄົງໃຫ້ແກ່ລະບົບໄຟຟ້າລາວ ເພື່ອຕອບສະໜອງໃຫ້ແກ່ການພັດທະນາອຸດສາຫະກຳ,ການບໍລິການ ແລະ ການລົງທຶນ ກ້າວຂຶ້ນຕາມທິດຫັນເປັນອຸດສາຫະກຳ ແລະ ທັນສະໄໝ. ກາຍເປັນແມ່ແຮງອັນສໍາຄັນແກ່ການຊຸກຍູ້ການພັດທະນາຂອງທ້ອງຖິ່ນ, ຫັນປ່ຽນແບບແຜນການດຳລົງຊີວິດຂອງປະຊາຊົນແບບທຳມະຊາດ, ເຄິ່ງທຳມະຊາດ ໄປສູ່ຜະລິດເປັນສິນຄ້າທີ່ຍືນຍົງຕາມທິດກ້າວຂຶ້ນສັງຄົມນິຍົມເທື່ອລະກ້າວ.

 

 

ຈຳນວນຜູ້ເຂົ້າຊົມ

71025
ມື້ນີ້:ມື້ນີ້:79
ມື້ວານນີ້:ມື້ວານນີ້:83
ອາທິດນີ້:ອາທິດນີ້:270
ເດືອນນີ້:ເດືອນນີ້:2954
ທັງໝົດ:ທັງໝົດ:71025