ເພີ່ມທະວີ ຄວາມສັກສິດ ແລະ ປະສິດທິຜົນ ໃນການບໍລິຫານ ແລະ ການຄຸ້ມຄອງລັດ-ສັງຄົມ,ສ້າງບາດກ້າວບຸກທະລຸ ອັນໝັກແໜ້ນ ໃນການນໍາພາປະເທດຊາດໃຫ້ຫຼຸດພົ້ນອອກຈາກສະຖານະພາບ ຂອງປະເທດດ້ອຍພັດທະນາ ໃນປີ 2020, ສໍາເລັດຄາດໝາຍສະຫັດສະຫວັດດ້ານການພັດທະນາ (MDGs) ປີ 2015 ແລະ ຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VII ຢ່າງມີໄຊ!

ຫ້ອງວ່າການແຂວງຈຳປາສັກ ເຜີແຜ່-ເຊື່ອມຊືມດຳລັດຂອງລັດຖະບານ ວຽກງານປະເມີນຜົນ ການປະຕິບັດວຽກງານ ພະນັກງານ-ລັດຖະກອນ

ກອງປະຊຸມ ເຜີແຜ່-ເຊື່ອມຊືມວຽກງານປະເມີນຜົນການປະຕິບັດວຽກງານພະນັກງານ-ລັດຖະກອນພາຍໃນ ຫ້ອງວ່າການແຂວງ ໃນຄັ້ງນີ້ ຈັດຂື້ນໃນຕອນເຊົ້າຂອງວັນທີ 11 ຕຸລາ 2018, ໄດ້ຮັບກຽດເຂົ້າຮ່ວມເປັນປະທານ ຂອງ ທ່ານ ບົວລີ ເພັດສົງຄາມ  ກຳມະການພັກແຂວງ, ຫົວໜ້າຫ້ອງວ່າການແຂວງຈຳປາສັກ, ພ້ອມນັ້ນຍັງມີບັນດາທ່ານໃນຄະນະຫ້ອງວ່າການ, ມີຫົວຂະແໜງ,ຮອງຂະແໜງ, ພະນັກງານ-ລັດຖະກອນພາຍໃນຫ້ອງວ່າການແຂວງ ທັງໝົດ ເຂົ້າຮ່ວມ.

ກອງປະຊຸມເຜີແຜ່-ເຊື່ອມຊືມວຽກງານປະເມີນຜົນການປະຕິບັດວຽກງານພະນັກງານ-ລັດຖະກອນພາຍໃນ ຫ້ອງວ່າການແຂວງໃນເທື່ອນີ້ ແມ່ນໄດ້ໄຂຂຶ້ນໃນທ່າມກາງທີ່ທົວພັກ, ທົ່ວປວງຊົນພ້ອມກັນຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ ຕິດພັນກັບການສ້າງຂະບວນການຂຳນັບຮັບຕ້ອນໃຫ້ແກ່ການດຳເນີນກອງປະຊຸມໃຫຍ່ 3 ຂັ້ນ,  ເຊິ່ງໄດ້ ຜ່ານຂໍ້ຕົກລົງ ຂອງຫ້ອງວ່າການ ວ່າດ້ວຍການແຕ່ງຕັ້ງຄະນະຊີ້ນຳ ການປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ພາຍໃນຫ້ອງວ່າການແຂວງຈຳປາສັກ ສະບັບເລກທີ 116/ຫວຂ; ຈາກນັ້ນໄດ້ເຜີຍແຜ່ ດຳລັດ ຂອງລັດຖະບານ ສະບັບເລກທີ 294/ລບ, ລົງວັນທີ 4 ກັນຍາ 2017 ວ່າດ້ວຍການຝຶກອົບຮົມ ແລະ ພັດທະນາ ພະນັກງານ-ລັດຖະກອນ ເຊິ່ງລວມມີ 7 ໝວດ, 43 ມາດຕາ ແລະ ດຳລັດ ຂອງລັດຖະບານ ສະບັບເລກທີ 300/ລບ, ລົງວັນທີ 13 ກັນຍາ 2017 ວ່າດ້ວຍການປະເມີນຜົນການປະຕິບັດວຽກງານ ຂອງພະນັກງານ-ລັດຖະກອນ ເຊິ່ງລວມມີ 7 ໝວດ, 29 ມາດຕາ. ພ້ອມທັງໄດ້ແຈກຢາຍ ແບບຟອມ ເນື້ອໃນມາດຖານການປະເມີນຜົນ ໃຫ້ພະນັກງານ-ລັດຖະກອນທັງໝົດທີ່ເຂົ້າຮ່ວມກອງປະຊຸມດັ່ງກ່າວ.

ເຊິ່ງເອກະສານດັ່ງກ່າວແມ່ນໄດ້ກຳນົດຫຼັກການ ແລະ ລະບຽບການ ກ່ຽວກັບການປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ເພື່ອເຮັດໃຫ້ວຽກງານດັ່ງກ່າວ ດຳເນີນຢ່າງເປັນລະບົບ, ຖືກຕ້ອງ, ສອດຄ່ອງກັບແນວທາງນະໂຍບາຍຂອງພັກ ແລະ ກົດໝາຍ ຂອງລັດ ຮັບປະກັນຄວາມເປັນເອກະພາບ, ໂປ່ງໃສ ແລະ ຖືກຕ້ອງຕາມສະພາບຄວາມເປັນຈິງ ແນ່ໃສ່ເພີ່ມຄວາມຮູ້ ຄວາມສາມາດ ເຮັດໃຫ້ວຽກງານການປະເມີນຜົນ ແລະ ຄຸ້ມຄອງຜົນການປະຕິບັດວຽກງານ ຂອງພະນັກງານ-ລັດຖະກອນ ທີ່ສັງກັດອົງການຈັດຕັ້ງພັກ, ລັດ, ແນວລາວສ້າງຊາດ, ອົງການຈັດຕັ້ງມະຫາຊົນຂັ້ນສູນກາງ ແລະ ອົງການປົກຄອງທ້ອງຖິ່ນ ໃນຂອບເຂດທົ່ວປະເທດ ໃຫ້ມີປະສິດທິພາບ ແລະ ປະສິດທິຜົນ, ສາມາດຕອບສະໜອງ ກັບຄວາມຮຽກຮ້ອງຕ້ອງການ ໃນການພັດທະນາ ເສດຖະກິດ-ສັງຄົມ ແລະ ການເຊື່ອມໂຍງກັບພາກພື້ນ ແລະ ສາກົນ.

 ຂ່າວ-ພາບ: ທັດຊະນະ ແສງດາລາ.

ເຈົ້າແຂວງຈຳປາສັກ ຕ້ອນຮັບ ທ່ານ ບຸ່ຍເຖ໋ຢຸ້ງ ກົງສູນໃຫຍ່ແຫ່ງ ສສ ຫວຽດນາມ ປະຈຳ 4 ແຂວງພາກໃຕ້

ວັນທີ 9 ຕຸລາ 2018, ທ່ານ ບຸນຖອງ ດີວິໄຊ ເລຂາພັກແຂວງ ເຈົ້າແຂວງຈຳປາສັກ ໄດ້ຕ້ອນຮັບ ທ່ານ ບຸ່ຍເຖ໋ຢຸ້ງ ກົງສູນໃຫຍ່ແຫ່ງ ສສ ຫວຽດນາມ ປະຈຳ 4 ແຂວງພາກໃຕ້ ທີ່ນະຄອນປາກເຊ  ແຂວງຈຳປາສັກ, ເຂົ້າພົບປະຢ້ຽມຢາມ ໃນໂອກາດທີ່ທ່ານຍ້າຍມາດຳລົງຕຳແໜ່ງໃໝ່ຢູ່ແຂວງຈຳປາສັກ.

ການຕ້ອນຮັບຄັ້ງນີ້ ຈັດຂຶ້ນຢູ່ຫ້ອງຮັບແຂກພິເສດ  ຫ້ອງວ່າການແຂວງ,   ໂອກາດຕ້ອນຮັບການຢ້ຽມຢາມໃນເທື່ອນີ້ ທ່ານ ບຸນຖອງ ດີວິໄຊ ເຈົ້າແຂວງຈຳປາສັກ ໄດ້ກ່າວສະແດງຄວາມຍິນດີຕ້ອນຮັບ  ພ້ອມທັງຍົກໃຫ້ເຫັນເຖິງຜົນງານການຮ່ວມມືທາງດ້ານຕ່າງ,   ມູນເຊື້ອການພົວພັນຮ່ວມມື  ແລະ ຄວາມສາມັກຄີແບບພິເສດ ລະຫວ່າງ ສອງຊາດ ລາວ-ຫວຽດນາມ, ຫວຽດນາມ-ລາວ   ໃນປີທີ່ຜ່ານມາເວົ້າລວມ, ເວົ້າສະເພາະກໍ່ຄື  ແຂວງຈຳປາສັກກັບກົງສູນໃຫຍ່ແຫ່ງ ສສ ຫວຽດນາມ ປະຈຳ 4 ແຂວງພາກໃຕ້   ແລະ  ໄດ້ເວົ້າເຖິງນະໂຍບາຍການຕ່າງປະເທດ ຂອງ ສສ ຫວຽດນາມ ຕໍ່ກັບພາກພື້ນ  ແລະ  ສາກົນ.   ສະເພາະການພົວພັນຮ່ວມມືກັບ ສປປ ລາວ   ເຊິ່ງຍາມໃດ ສສ ຫວຽດນາມ ກໍ່ຖືເອົາການພົວພັນຮ່ວມມືກັບ ສປປ ລາວ  ເປັນອັນດັບໜຶ່ງ   ນອກນີ້ຍັງໄດ້ກ່າວເຖິງການຮ່ວມມືລະຫວ່າງ ນະຄອນໂຮ່ຈິມິນ-ນະຄອນຫຼວງວຽງຈັນ-ແຂວງຈຳປາສັກ ຕໍ່ກັບການເກັບລາຍຮັບຜ່ານລະບົບອີເລັກໂທນິກ,   ການຮ່ວມມືຊ່ວຍເຫຼືອໃນການຮັບມື-ແກ້ໄຂປະກົດການຫຍໍ້ທໍ້ໃນສັງຄົມ.

ຈາກນັ້ນ  ທ່ານ ບຸ່ຍເຖ໋ຢູ້ງ ກົງສູນໃຫຍ່   ກໍໄດ້ກ່າວສະແດງຄວາມຂອບອົກຂອບໃຈເປັນຢ່າງຍິ່ງ   ຕໍ່ການຕ້ອນຮັບດັ່ງກ່າວ,   ພ້ອມນີ້ຍັງໄດ້ພ້ອມກັນຕັ້ງໜ້າສືບຕໍ່ເສີມສ້າງສາຍພົວພັນມິດຕະພາບ ເພື່ອຮັດແໜ້ນຄວມສາມັກຄີໄມຕີຈິດ ມິດຕະພາບພິເສດ ລາວ-ຫວຽດນາມ ເວົ້າລວມເວົ້າສະເພາະ ແຂວງຈຳປາສັກ ກັບ ກົງສູນໃຫຍ່ຫວຽດນາມໃຫ້

ແໜ້ນແຟ້ນຍິ່ງໆຂຶ້ນ.

 ຂ່າວ-ພາບ: ທັດຊະນະ ແສງດາລາ

ພິທີວາງສີລາລຶກໂຄງການຊ່ວຍເຫຼືອລ້າ ກໍ່ສ້າງເສັ້ນທາງເບຕົງອ້ອມດອນໂຂງ ທີ່ມີຄວາມຍາວ 43 ກິໂລແມັດ

ພິທີວາງສີລາລຶກໂຄງການຊ່ວຍເຫຼືອລ້າ ກໍ່ສ້າງເສັ້ນທາງເບຕົງອ້ອມດອນໂຂງ ທີ່ມີຄວາມຍາວ 43 ກິໂລແມັດ ຈັດຂື້ນຢ່າງເປັນທາງການມື້ວັນທີ 6 ຕຸລາ 2018, ໂດຍການເຂົ້າຮ່ວມ ແລະ ກ່າວເປີດພິທີຂອງທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສ ປປລາວ, ທ່ານ ລັດຖະມົນຕີ-ຮອງລັດຖະມົຍຕີ ພ້ອມຄະນະຕິດຕາມ, ທ່ານ ບຸນຖອງ ດີວິໄຊ ເລຂາພັກແຂວງ, ເຈົ້າແຂວງຈຳປາສັກ ພ້ອມຄະນະຕິດຕາມ, ພາກສ່ວນບໍລິສັດພັດທະນາ ສີທັນດອນຈຳກັດ, ປະຊາຊົນຊາວເມືອງໂຂງ ແລະ ອ້ອມຂ້າງເຂົ້າຮ່ວມ.

ການວາງສີລາລຶກໂຄງການກໍ່ສ້າງເສັ້ນທາງອ້ອມດອນໂຂງ, ເມືອງໂຂງໃນເທື່ອນີ້ ແມ່ນກິດຈະກຳ 1 ທີ່ນອນໃນ 17 ກິດຈະກຳໄລຍະທີ 1 ( 2018-2025 ) ຂອງໂຄງການ ພັດທະນາເສດຖະກິດໃໝ່ ສີທັນດອນ, ເປັນໂຄງການຊ່ວຍເຫຼືອລ້າ ໃນມູນຄ່າ 25 ລ້ານໂດລາສະຫະລັດ, ມີຄວາມຍາວ 43 ກິໂລແມັດ ແລະ ຈະສຳເລັດໃນປີ 2020; ເສັ້ນທາງດັ່ງກ່າວຈະຮອງຮັບໃຫ້ແກ່ການຂົນສົ່ງໄປມາ, ການຄ້າ-ການບໍລິການ ແລະ ການທ່ອງທ່ຽວ, ດຶງດູດນັກທ່ອງທ່ຽວໃຫ້ເຂົ້າມາທ່ຽວຊົມຫຼາຍຂື້ນ; ໃນເຂດດອດໂຂງກໍ່ຈະເກີດມີຫຼາຍກິດຈະກຳຊື້-ຂາຍ, ການບໍລິຫານ, ການທ່ອງທ່ຽວທີ່ຫຼາກຫຼາຍ, ໜ້າຢູ່ ໜ້າທ່ຽວຊົມ ແລະ ຈະກາຍເປັນສິ່ງປະດັບເອ້ໂສມໜ້າໃໝ່  ໃຫ້ເມືອງໂຂງນຳອີກດ້ວຍ.

ໂຄງການພັດທະນາເສດຖະກິດໃໝ່ ສີທັນດອນ ມີເນື້ອທີ່ທັງໝົດ 9,846 ເຮັກຕາ, ປະກອບມີ 6 ໄລຍະຮອດປີ 2050,  ລວມມີຫຼາຍກິດຈະກຳ ມີມູນຄ່າຫຼາຍກວ່າ 9 ຕື້ໂດລາສະຫະລັດ; ຖ້າໂຄງການນີ້ສຳເລັດ ເມື່ອຮອດປີ 2050 ຈະມີ ນັກທ້ອງທ່ຽວເຂົ້າມາເຖິງ 15 ລ້ານເທື່ອຄົນຕໍ່ປີ, ຈະສ້າງລາຍຮັບໃຫ້ຂະແໜງການທ່ອງທ່ຽວເຖິງ 2,4 ຕື້ໂດລາສະຫະລັດ;  ການພັດທະນາດ້ານອຸດສະຫະກຳຕິດພັນກັບການປຸງແຕ່ງ, ຕະຫຼາດ, ການຂົນສົ່ງ ແລະ ສ້າງມູນຄ່າເພີ່ມໃນຂົງເຂດອຸດສະຫະກຳໄດ້ 637 ລ້ານໂດລາສະຫະລັດຕໍ່ປີ; ພາກລັດມີລາຍຮັບເຂົ້າງົບປະມານ 170 ລ້ານໂດລາສະຫະລັດຕໍ່ປີ;  ສ້າງວຽກເຮັດງານທຳໃຫ້ປະຊາຊົນເມືອງໂຂງ ແລະ ເມືອງໃຫ້ຄຽງ ທັງທາງກົງ ແລະ ທາງອ້ອມເຖິງ 32.280 ຕຳແໜ່ງງານ ມີລາຍໄດ້ຕ່ຳສຸດ 9.435 ໂດລາສະຫະລັດຕໍ່ຄົນຕໍ່ປີ; ບັນດາພື້ນຖານໂຄງລ່າງ, ຖະໜົນຫົນທາງ,ໂຮງຮຽນ, ໂຮງໝໍ, ສູນຝຶກອົບຮົມວິຊາຊີບ,ລະບົບບຳບັດນ້ຳເປື້ອນ,ກຳຈັດຂີ້ເຍື່ອ ລວມໄປເຖິງຊີວິດການເປັນຢູ່ຂອງປະຊາຊົນ ຈະໄດ້ຮັບການປັບປຸງຍົກລະດັບ ໃຫ້ດີຂື້ນ; ໃນໄລຍະທີ 1 ແຕ່ນີ້ຮອດປີ 2025 ຈະມີນັກທ່ອງທ່ຽວເຂົ້າມາເຖິງ 2,3 ລ້ານເທື່ອຕໍ່ປີ ແລະ ຈະສ້າງລາຍຮັບໄດ້ເຖິງ 263 ລ້ານໂດລາສະຫະລັດ.

ຈາກນັ້ນທາງຄະນະທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສ ປປລາວ,ພ້ອມດ້ວຍຄະນະນຳຕິດຕາມ, ທ່ານ ເຈົ້າແຂວງຈຳປາສັກ ໄດ້ລົງພົບປະ ໂອ້ລົມກັບເຈົ້າເມືອງ,ພະນັກງານຫຼັກແຫຼ່ງ, ເລຂາພັກບ້ານ, ນາຍບ້ານ ທີ່ຢູ່ໃນພື້ນທີ່ເຂດເມືອງໂຂງ ກ່ຽວກັບໂຄງການພັດທະນາເສດຖະກິດໃໝ່ ສີທັນດອນ; ຈາກນັ້ນທາງຄະນະນະຍັງໄດ້ລົງໄປເບິ່ງ ສູນເພາະພັນປານ້ຳຂອງ ແລະ ສູນພັດທະນາແນວພັນເຂົ້າທີ່ຢູ່ໃນເຂດດອນໂຂງ.

 

ຂ່າວ-ພາບ: ທັດຊະນະ ແສງດາລາ

ພິທີມອບບັດສະມາຊິກພັກສົມບູນ ຊຸດທີ II ຂອງໜ່ວຍພັກທີ່ຂື້ນກັບຄະນະພັກຮາກຖານ ຫວຂ.ຈສ

ຕອນເຊົ້າຂອງວັນທີ 4 ຕຸລາ 2018ນີ້, ທີ່ສຳນັກງານ ຫ້ອງວ່າການແຂວງຈຳປາສັກ ໄດ້ມີພິທີປະກາດແຕ່ງຕັ້ງຄະນະພັກຮາກຖານຫ້ອງວ່າການແຂວງ ພ້ອມທັງມອບບັດສະມາຊິກພັກ ໃຫ້ສະມາຊິກພັກສົມບູນ ຊຸດທີ II, ໂດຍການໃຫ້ກຽດເປັນປະທານຂອງ ທ່ານ ສົມສະໜິດ ບຸດຕິວົງ ຮອງເລຂາພັກແຂວງ ຮອງເຈົ້າແຂວງຈຳປາສັກ, ເຂົ້າຮ່ວມພິທີມີ ທ່ານ ບົວລີ ເພັດສົງຄາມ ກຳມະການພັກແຂວງ ຫົວໜ້າຫ້ອງວ່າການແຂວງຈຳປາສັກ, ທ່ານ ສີເລືອງ ສັກຂັນ ຮອງຄະນະຈັດຕັ້ງແຂວງ, ພ້ອມທັງຄະນະພັກຮາກຖານ, ສະມາຊິດພັກສົມບູນ ແລະ  ສຳຮອງທັງໝົດທີ່ຂື້ນກັບຮາກຖານຫ້ອງວ່າການແຂວງຈຳປາສັກເຂົ້າຮ່ວມ.

ຕອນຕົ້ນ ທ່ານ ບົວລີ ເພັດສົງຄາມ ຫົວໜ້າຫ້ອງວ່າການແຂວງຈຳປາສັກ ໄດ້ຂື້ນຜ່ານບົດສະຫຼຸບຈັດຕັ້ງການເຄື່ອນໄຫວອອກບັດ-ມອບບັດສະມາຊິກພັກສົມບູນ ຂອງຄະນະພັກຮາກຖານຫ້ອງວ່າການແຂວງ ທີ່ໄດ້ດຳເນີນເປັນຊຸດທີ II, ເຊິ່ງວ່າການມອບບັດສະມາຊິກພັກສົມບູນໃຫ້ບັນດາສະມາຊິກພັກສົມບູນທັງ 20 ສະຫາຍ,ຍິງ 3 ສະຫາຍ ທີ່ນອນໃນ 4 ໜ່ວຍພັກຄື: ໜ່ວຍພັກຂະແໜງຄົ້ນຄວ້າສັງລວມ 9 ສະຫາຍ, ຍິງ 2 ສະຫາຍ, ໜ່ວຍພັກຂະແໜງເລຂາການນຳ 3 ສະຫາຍ, ໜ່ວຍພັກຂະແໜງຈັດຕັ້ງ,ບໍລິຫານ ແລະການເງິນ 6 ສະຫາຍ, ຍິງ 1 ສະຫາຍ ແລະ ໜ່ວຍພັກປ້ອງກັນຊາດ-ປ້ອງການຄວາມສະຫງົບ 2 ສະຫາຍ,  ເຊິ່ງສະມາຊິກພັກໄດ້ຮັບບັດທັງໝົດແລ້ວ 60 ສະຫາຍ ໃນຈຳນວນ 65 ສະຫາຍ.ພ້ອມທັງປະກາດບົ່ງຕົວ ສະຫາຍ ພັທ ພູວຽງ ບຸດດາວົງ ຫົວໜ້າຫ້ອງການ ປກຊ-ປກສ ແຂວງ ເປັນຄະນະພັກຮາກຖານ ຫ້ອງວ່າການແຂວງຈຳປາສັກ ຕາມເນື້ອໃນມະຕິຕົກລົງ ຂອງຄະນະປະຈຳພັກແຂວງ ເລກທີ 459/ຄຈພຂ.ຈສ, ວ່າດ້ວຍການອະນຸມັດບົົ່ງຕົວແຕ່ງຕັ້ງຄະນະພັກຮາກຖາານ ຫ້ອງວ່າການແຂວງຈຳປາສັກ.

ໂອກາດດັ່ງກ່າວ ທ່ານ ສົມ​ສະໜິດ ບຸດ​ຕິ​ວົງ ຮອງ​ເລຂາ​ພັກ​ແຂວງ, ຮອງ​​ເຈົ້າ​ແຂວງໆ​ຈຳປາ​ສັກ ໄດ້ໃຫ້ກຽດໂອ້ລົມຕໍ່ພິທີມອບບັດໃຫ້ສະມາຊິກພັກສົມບູນ ແລະ ການແຕ່ງຕັ້ງບົ່ງຕົວ ຄະນະພັກຮາກຖານຫ້ອງວ່າການແຂວງຈຳປາສັກ, ກ່ອນອື່ນທ່ານໄດ້ກ່າວສະແດງຄວາມຍິນດີ ແລະ ຍ້ອງຍໍຊົມເຊີຍ, ການຈັດຕັ້ງພິທີ ມອບບັດໃຫ້ສະມາຊິກພັກສົມບູນ ແລະ ພິທີປະກາດການແຕ່ງຕັ້ງບົ່ງຕົວຄະນະພັກຮາກຖານຂອງພວກເຮົາໃນຄັ້ງນີ້  ແມ່ນດຳເນີນຂື້ນໃນທາມກາງບັນຍາກາດທີ່ທົ່ວອົງຄະນະພັກແຂວງຈຳປາສັກຂອງພວກເຮົາ ພວມສຸມຈິດສຸມໃຈໃນການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ X ຂອງພັກ, ກໍ່​ຄືມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງຈຳປາສັກ ເຂົ້າສູ່ຊີວິດຕົວຈິງ; ໂດຍຕິດພັນກັບການຫັນພະນັກງານນຳພາຫຼັກແຫຼ່ງຂອງແຂວງ ແລະ ເມືອງເພື່ອລົງກໍ່ສ້າງຮາກຖານການເມືອງ ພັດທະນາຊົນລະບົດລຶບລ້າງຄວາມທຸກຍາກຂອງປະຊາຊົນ ເຊິ່ງໃນນີ້ແມ່ນໄດ້ສຸມໃສ່ໃນການສ້າງບ້ານ ແລະ ກຸ່ມບ້ານພັດທະນາຕາມ 4 ເນື້ອໃນ 4 ຄາດໝາຍ, ສ້າງບ້ານໃຫ້ໃຫ້ກາຍເປັນຕົວເມືອງນ້ອຍຢູ່ຊົນນະບົດ ໂດຍຕິດພັນການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານໃຫ້ເປັນຫົວໜ່ວຍພັດທະນາ; ພິເສດແມ່ນການຊີ້ນຳ ແລະ ຊຸກຍູ້ຂະບວນການແຂ່ງຂັນ “ຮັກຊາດ ແລະ ພັດທະນາ” ສ້າງຜົນງານຂ່ຳນັບຮັບຕ້ອນວັນປະຫວັດສາດສຳຄັນຂອງພັກຂອງຊາດໃນປີ 2018 ໂດຍຕິດພັນກັບການກະກຽມກອງປະຊຸມໃຫຍ່ຂອງພັກຢູ່ຂັ້ນທ້ອງຖິ່ນ ຢ່າງເປັນຂະບວນກວ້າງຂວາງ, ແຂງກແຮງ ແລະ ຟົດຟື້ນ.

ຈຳນວນຜູ້ເຂົ້າຊົມ

85072
ມື້ນີ້:ມື້ນີ້:92
ມື້ວານນີ້:ມື້ວານນີ້:82
ອາທິດນີ້:ອາທິດນີ້:248
ເດືອນນີ້:ເດືອນນີ້:2406
ທັງໝົດ:ທັງໝົດ:85072